सेउटा शहरात हजारो स्थलांतरितांचा प्रवेश; सुरक्षा यंत्रणा सतर्क, युरोपमध्ये चिंतेचे वातावरण
माद्रिद : स्पेन आणि मोरोक्को यांच्या सीमेलगतची परिस्थिती अत्यंत गंभीर बनली असून, मोठ्या प्रमाणावर झालेल्या बेकायदेशीर घुसखोरीमुळे दोन्ही देशांतील तणाव वाढला आहे. मोरोक्कोमधून हजारो स्थलांतरितांनी जमीन आणि समुद्रमार्गे स्पेनच्या सेउटा शहरात प्रवेश केल्याने सुरक्षा व्यवस्थेवर मोठा ताण निर्माण झाला आहे. परिस्थिती नियंत्रणाबाहेर जाण्याची चिन्हे दिसताच स्पॅनिश सरकारने शहरात सैन्य तसेच अतिरिक्त पोलिस दल तैनात करण्याचा निर्णय घेतला आहे. या घटनांदरम्यान आतापर्यंत 18 जणांचा मृत्यू झाल्याची माहिती समोर आली आहे.
उपलब्ध माहितीनुसार, चांगल्या भविष्याच्या आणि रोजगाराच्या शोधात मोरोक्कोमधील हजारो नागरिकांनी स्पेनमध्ये बेकायदेशीररित्या प्रवेश करण्याचा प्रयत्न केला. अनेकांनी समुद्र पोहून सीमा ओलांडली, तर काहींनी सीमावर्ती भागातून थेट सेउटा शहरात प्रवेश केला. या घुसखोरीचे अनेक व्हिडिओ सोशल मीडियावर मोठ्या प्रमाणात व्हायरल होत आहेत.
NEW: Spain is now deploying its military after thousands of military-aged men stormed over the border into Ceuta, Spain.
— Collin Rugg (@CollinRugg) July 30, 2026
Ceuta authorities are calling on Madrid to declare a national emergency after the border "totally collapsed."
"The situation is absolute chaos. It’s not… pic.twitter.com/Mpe5Lc1xlK
न्यूयॉर्क टाइम्सच्या वृत्तानुसार, निर्माण झालेल्या गोंधळात आतापर्यंत 18 जणांचा जीव गेला आहे. परिस्थिती गंभीर होत असल्याने स्पेनने सेउटामध्ये सैन्य तैनात केले आहे. रस्त्यांवर मोठ्या प्रमाणात जमलेली गर्दी, समुद्रात तरंगणारे मृतदेह आणि सीमाव्यवस्थेतील त्रुटींमुळे संपूर्ण युरोपमध्ये चिंतेचे वातावरण निर्माण झाले आहे. या पार्श्वभूमीवर दोन्ही देशांतील तणाव आणखी वाढल्याचे दिसत आहे.
या घुसखोरीमध्ये केवळ तरुण पुरुषच नव्हे, तर महिला आणि लहान मुलांचाही समावेश असल्याची माहिती समोर आली आहे. स्थलांतरितांची संख्या सातत्याने वाढत असल्याने सेउटा परिसरातील सीमा सुरक्षा व्यवस्थेवर मोठा ताण निर्माण झाला आहे.
स्पॅनिश सरकारने स्पष्ट केले की, सेउटा शहरात कायदा आणि सुव्यवस्था राखण्यासाठी सिव्हिल गार्डला मदत म्हणून सैन्य तैनात करण्यात आले आहे. तसेच, स्पेनचे पंतप्रधान पेद्रो सांचेझ हे शुक्रवारी गृहमंत्री फर्नांदो ग्रांदे-मार्लास्का यांच्यासह सेउटा येथे परिस्थितीचा आढावा घेण्यासाठी भेट देणार आहेत.
सोशल मीडियावर व्हायरल झालेल्या व्हिडिओंमध्ये तराजल समुद्रकिनाऱ्याच्या मार्गाने मोठ्या संख्येने नागरिक सेउटामध्ये प्रवेश करताना दिसत आहेत. बहुतांश घुसखोर हे मोरोक्कोचे नागरिक असल्याचे सांगितले जात आहे. हजारो स्थलांतरितांच्या या लोंढ्यानंतर स्पेनने सीमावर्ती भागात सुरक्षा अधिक कडक केली आहे.
या संकटाचे पडसाद इतर युरोपीय देशांवरही उमटताना दिसत आहेत. स्थलांतरितांसाठी महत्त्वाचे प्रवेशद्वार मानल्या जाणाऱ्या इटलीनेही चिंता व्यक्त केली आहे. स्पेनसोबत थेट सीमा नसतानाही, नागरिकांच्या सुरक्षेच्या दृष्टीने शेंगेन खुला सीमा करार तात्पुरता निलंबित करण्याचा विचार केला जाऊ शकतो, असा इशारा इटलीच्या पंतप्रधान जॉर्जियो मेलोनी यांनी दिला आहे.
