सुराबायाहून बंजारमासिनकडे जाताना ‘व्हार्गो ट्रान्सपोर्ट ८’शी संपर्क तुटला; तांत्रिक बिघाड आणि अचानक बदललेल्या हवामानाची शक्यता
जकार्ता : इंडोनेशियातील जावा समुद्रात २४० प्रवाशांना घेऊन जाणाऱ्या ‘व्हार्गो ट्रान्सपोर्ट ८’ या जहाजाचा अचानक संपर्क तुटल्याने प्रशासनाची चिंता वाढली आहे. जहाज बेपत्ता झाल्यानंतर स्थानिक बचाव यंत्रणांनी तातडीने समुद्रात शोध आणि बचाव अभियान सुरू केले आहे. जहाजासोबत नेमके काय घडले, याचे कारण अद्याप स्पष्ट झालेले नाही.
मिळालेल्या माहितीनुसार, हे जहाज पूर्व जावाहून बोर्नियो बेटावरील दक्षिण कालीमंतनच्या दिशेने रवाना झाले होते. प्रत्यक्षात ते इंडोनेशियातील दुसरे सर्वात मोठे शहर असलेल्या सुराबाया येथून बंजारमासिनकडे प्रवास करत होते. प्रवासादरम्यान अचानक जहाजाशी संपर्क तुटला.
शोध आणि बचाव कार्यालयाच्या माहितीनुसार, तांत्रिक बिघाडामुळे ‘व्हार्गो ट्रान्सपोर्ट ८’शी संपर्क खंडित झाल्याची प्राथमिक माहिती समोर आली आहे. दुसरीकडे, जहाजाच्या ऑपरेटरने अधिकाऱ्यांना समुद्रातील हवामानात अचानक बदल झाल्यामुळे संपर्क तुटल्याचे सांगितले आहे. त्यामुळे जहाज बेपत्ता होण्यामागे नेमके कारण काय, याबाबत अद्याप अधिकृत स्पष्टता झालेली नाही.
प्राथमिक माहितीनुसार, जहाजाचे शेवटचे लोकेशन बंजारमासिनच्या किनाऱ्यापासून सुमारे १४८ किलोमीटर अंतरावर जावा समुद्रात नोंदवण्यात आले होते. घटनास्थळी पोहोचून जहाजाचा शोध घेण्यासाठी बचाव पथके वेगाने प्रयत्न करत आहेत. दरम्यान, या घटनेत अद्याप कोणतीही जीवितहानी झाल्याचे वृत्त समोर आलेले नाही.
बंजारमासिन बचाव संस्थेचे कार्यप्रमुख अरियांतो अर्दी यांनी जहाजाशी संपर्क तुटल्याच्या वृत्ताला दुजोरा दिला आहे. परिस्थितीवर देखरेख ठेवण्यासाठी तसेच शोध आणि बचाव कारवाईचे समन्वय साधण्यासाठी त्रिशक्ती येथे ऑपरेशन पोस्ट स्थापन करण्यात आल्याची माहिती त्यांनी दिली.
समुद्रात बेपत्ता झालेल्या जहाजाचा ठावठिकाणा शोधण्यासाठी बचाव आणि मदत पथके सातत्याने कार्यरत आहेत. २४० प्रवाशांच्या सुरक्षिततेचा प्रश्न असल्याने जहाजापर्यंत शक्य तितक्या लवकर पोहोचण्याचे प्रयत्न सुरू आहेत.
