‘इंडियन आयडॉल’च्या यशानंतर अभिजीत प्रसिद्धीच्या झोतात; अरिजितने मात्र जवळपास दशकभर पडद्यामागे राहून संगीत क्षेत्रात केली मेहनत
२००५ मध्ये रिॲलिटी शोच्या माध्यमातून संगीत क्षेत्रात आलेल्या अभिजीत सावंत आणि अरिजित सिंग यांच्या कारकिर्दीने पुढे वेगवेगळे वळण घेतले. ‘इंडियन आयडॉल’च्या पहिल्या पर्वाचा विजेता ठरलेला अभिजीत अल्पावधीत घराघरात पोहोचला. त्याच काळात अरिजितने प्रसिद्धीपासून दूर राहून संगीत क्षेत्रातील पडद्यामागचे काम शिकण्यावर आणि स्वतःची ओळख निर्माण करण्यावर भर दिला. आता अभिजीतने अरिजितच्या या प्रवासातील काही महत्त्वाच्या पैलूंवर भाष्य केले आहे.
अभिजीतच्या म्हणण्यानुसार, २००५ नंतर अरिजित सिंग जवळपास दहा वर्षे प्रसिद्धीच्या झोतात नव्हता. या काळात त्याने अनेक नामांकित संगीतकारांसोबत काम केले. गायक म्हणून पुढे येण्यापूर्वी निर्माता आणि प्रोग्रामर म्हणून स्वतःला घडविण्याचा त्याचा प्रयत्न सुरू होता.
याउलट, ‘इंडियन आयडॉल’चा पहिला सीझन जिंकल्यानंतर अभिजीत सावंतला मोठी प्रसिद्धी मिळाली. विजयानंतर त्याला १ कोटी रुपयांचे बक्षीस तसेच सोनीसोबत अल्बमची डील मिळाली. त्यामुळे त्या काळात त्याची लोकप्रियता मोठ्या प्रमाणात वाढली आणि तो देशभरातील प्रेक्षकांपर्यंत पोहोचला.
या दोन्ही कलाकारांच्या सुरुवातीच्या प्रवासाकडे पाहताना लोकप्रियतेतील फरकही स्पष्टपणे जाणवत होता, असे अभिजीतने नमूद केले. त्याच्यावर चाहत्यांच्या अपेक्षा आणि सतत मिळणाऱ्या सार्वजनिक मान्यतेचा दबाव होता, तर अरिजित प्रसिद्धीपासून दूर राहून आपल्या कामावर लक्ष केंद्रित करत होता.
अरिजितने सुमारे दहा वर्षे मेहनत घेतल्यानंतर त्याच्या कारकिर्दीला मोठी संधी मिळाली. ‘मर्डर २’ चित्रपटातील ‘दिल संभल जा जरा’ हे गाणे त्याने यापूर्वी गायले होते. मात्र, ‘आशिकी २’मधील ‘तुम ही हो’ या गाण्याने त्याच्या कारकिर्दीला निर्णायक वळण मिळाले आणि अरिजित सिंगची स्वतंत्र ओळख निर्माण झाली.
अरिजितच्या यशामागे मेहनतीसोबतच योग्य वेळ आणि नशिबाचीही भूमिका असल्याचे अभिजीतने म्हटले. ‘तुम ही हो’सारखे गाणे एखाद्या गायकाच्या कारकिर्दीत येणे ही मोठी संधी असते आणि त्यात नशिबाचा भागही असतो, असे त्याचे मत आहे.
अभिजीतने कलाकारांच्या यशाकडे पाहण्याच्या दृष्टिकोनावरही भाष्य केले. यश मिळवलेल्या कलाकारांचे कौतुक केले जाते; मात्र अपेक्षित ओळख न मिळालेल्या कलाकारांमध्ये अनेकदा दोष शोधले जातात. प्रत्येक कलाकाराचा प्रवास वेगळा असतो आणि आपल्या आयुष्यात तसेच कारकिर्दीत पुढे जाण्यासाठी प्रत्येकजण आपापल्या पद्धतीने प्रयत्न करत असतो. त्यामुळे केवळ यश किंवा अपयशाच्या आधारावर एखाद्या कलाकाराचे मूल्यमापन करणे योग्य नसल्याचे अभिजीतने सांगितले.
