कोल्हापूर (Rahul Gandhi) : विरोधी पक्षनेते राहुल गांधी यांनी आपली भूमिका पार पाडताना भाषेचे भान ठेवणे गरजेचे आहे. देशाचे पंतप्रधान नरेंद्र मोदी आणि केंद्रीय गृहमंत्री अमित शाह यांचा एकेरी उल्लेख करणे राहुल गांधींना (Rahul Gandhi) शोभत नाही. त्यांनी दोन्ही नेत्यांचा योग्य तो सन्मान राखला पाहिजे, असे वैद्यकीय शिक्षण मंत्री हसन मुश्रीफ (Hasan Mushrif) यांनी म्हटले आहे.
हसन मुश्रीफ (Hasan Mushrif) म्हणाले की, राहुल गांधी (Rahul Gandhi) हे विरोधी पक्षनेते असले तरी कोणाचाही अपमान करण्याचा किंवा शिवीगाळ करण्याचा अधिकार त्यांना नाही. नरेंद्र मोदी आणि अमित शाह हे वयाने तसेच राजकीय अनुभवाने राहुल गांधींपेक्षा मोठे आहेत. त्यामुळे त्यांनी वयाचा आणि पदाचा सन्मान राखत भाषेचा वापर करावा, असा सल्ला मुश्रीफ यांनी दिला.
इथेनॉल धोरणावरही मुश्रीफ यांचे भाष्य
इथेनॉल धोरणाबाबत बोलताना हसन मुश्रीफ (Hasan Mushrif) म्हणाले की, देशात इथेनॉल धोरणाची सुरुवात माजी पंतप्रधान अटल बिहारी वाजपेयी यांच्या कार्यकाळात झाली. या धोरणाचे स्वागत केले पाहिजे. इथेनॉल धोरणामुळे ऊस उत्पादक शेतकऱ्यांना मोठा फायदा झाला असून, त्यातून शेतकऱ्यांची एफआरपी देण्यासही मदत होत आहे.
राहुल गांधी (Rahul Gandhi) यांनी इथेनॉल धोरणावर टीका करण्यापूर्वी त्याचा शेतकऱ्यांना होणारा फायदा समजून घ्यावा. शेतकऱ्यांचे नुकसान करून राहुल गांधींना नेमके काय साध्य करायचे आहे, हे मला माहीत नाही, असेही मुश्रीफ म्हणाले.
शरद पवार यांनी मला गोविंदबाग येथील ऊस तंत्रज्ञानाची पाहणी करण्यासाठी बोलावले आहे. त्यावेळी पवार साहेबांना इथेनॉल धोरणाबाबत राहुल गांधींना समजावून सांगण्याची विनंती करणार असल्याचेही मुश्रीफ यांनी सांगितले.
इथेनॉलमुळे वाहनांचे नुकसान होते, असे कोणत्याही वाहन कंपनीने सांगितलेले नाही. केवळ इथेनॉल मिश्रित इंधनामुळे मायलेजमध्ये काही प्रमाणात घट होऊ शकते, असे सांगितले जात आहे. तसेच धान्य उत्पादक शेतकऱ्यांनाही इथेनॉल धोरणाचा मोठा फायदा होत असल्याचा दावा (Hasan Mushrif) हसन मुश्रीफ यांनी केला.
