पंजाबचे माजी उपमुख्यमंत्री सुखबीरसिंह बादल यांच्यावर नांदेडात हल्ला

नांदेड (Sukhbir Singh Badal) : पंजाबचे माजी उपमुख्यमंत्री सुखबीरसिंघ बादल हे नांदेड दौर्‍यावर आले असता त्यांच्यावर गुरुवारी दुपारी १.५० च्या सुमारास खंजरने हल्ला करण्यात आला. या हल्ल्यात त्यांच्या हाताला गंभीर दुखापत झाली आहे. त्यांच्यावर नांदेड येथील यशोसाई रुग्णालयात उपचार सुरू आहेत. पंजाबचे माजी उपमुख्यमंत्री सुखबीरसिंह बादल (Sukhbir Singh Badal) हे नांदेड जिल्हा दौर्‍यावर आले आहेत. गुरुवारी दुपारी ते गुरुद्वारा मातासाहेब देवाजी मुगट ता. मुदखेड येथील दर्शन घेऊन पायर्‍याने खाली येत असताना त्यांच्यावर एका शिख सेवादाराने त्याच्या हातातील खंजर मारून त्यांना जखमी केले आहे. 

दरम्यान बादल (Sukhbir Singh Badal) त्यांच्या सोबत सुरक्षेसाठी असलेले एसपीयुचे पोलिस निरीक्षक संतोष केंद्रे हे त्यांच्या बचावासाठी धावुन गेले असता त्यांच्या हाताला सुद्धा जखम झाली आहे. त्यांच्यावर यशोसाई रुग्णालय येथे उपचार सुरू असून दोघांचीही प्रकृती चांगली आहे. हल्ला करणार्‍या सेवादारास पोलिसांनी ताब्यात घेतले असून पुढील कायदेशीर कारवाई सुरू आहे. 

नांदेडचे जिल्हाधिकारी राहुल कर्डिले,  पोलिस उपमहानिरीक्षक शहाजी उमाप, पोलिस अधिक्षक डॉ .निलाभ रोहण यांनी रुग्णालयास भेट देऊन बादल यांच्या प्रकृतीची चौकशी केली आहे. यावेळी रुग्णालय परिसरात मोठा पोलीस बंदोबस्त ठेवण्यात आला आहे.