दक्षिण रायगडमध्ये संघटनात्मक घडामोडींना वेग; नाराज पदाधिकारी भाजप किंवा शिंदेसेनेत जाण्याची चर्चा
राज ठाकरे यांच्या ९ ऑगस्ट रोजी होणाऱ्या रायगड दौऱ्यापूर्वी महाराष्ट्र नवनिर्माण सेनेला जिल्ह्यात मोठा संघटनात्मक धक्का बसला आहे. दौऱ्याला अवघे आठ दिवस शिल्लक असताना जिल्हा पातळीवरील अनेक महत्त्वाच्या पदाधिकाऱ्यांनी पक्षाच्या पदांसह प्राथमिक सदस्यत्वाचा राजीनामा दिल्याने राजकीय वर्तुळात चर्चांना उधाण आले आहे.
मिळालेल्या माहितीनुसार, राजीनामा देणाऱ्यांमध्ये मनसेचे माजी रायगड संपर्क अध्यक्ष दिलीप सांगळे, विद्यार्थी सेना रायगड जिल्हाध्यक्ष प्रतिक रहाटे, रोहा तालुका अध्यक्ष बाबू फुलारे तसेच माथाडी अध्यक्ष राजा टेंबे यांचा समावेश आहे. या सर्वांनी आपल्या राजीनाम्याची पत्रे पक्षाध्यक्ष राज ठाकरे यांच्याकडे पाठवल्याची माहिती समोर आली आहे.
या घडामोडीमुळे रायगडमधील मनसेच्या संघटनात्मक ताकदीवर परिणाम होण्याची शक्यता व्यक्त केली जात आहे. विशेषतः जिल्हास्तरावरील प्रमुख पदाधिकाऱ्यांनी एकाच वेळी पक्ष सोडण्याचा निर्णय घेतल्याने स्थानिक राजकारणात विविध चर्चांना उधाण आले आहे.
दरम्यान, पक्षात अलीकडे झालेल्या पदाधिकारी फेरबदलांबाबत तसेच कार्यपद्धतीबाबत काही पदाधिकारी आणि कार्यकर्त्यांमध्ये नाराजी असल्याचे सांगितले जात आहे. दक्षिण रायगडमध्ये सुरू झालेल्या या राजीनामा सत्रामुळे मनसेसमोर संघटनात्मक आव्हान उभे राहिले आहे.
राजीनामा दिलेल्या पदाधिकाऱ्यांचा पुढील राजकीय निर्णय अद्याप स्पष्ट झालेला नाही. मात्र, ते सत्ताधारी भाजप किंवा शिंदेसेनेत प्रवेश करू शकतात, अशी चर्चा राजकीय वर्तुळात सुरू आहे.
