नकाशासाठी लढली लव्हलिना; मोदींकडून कौतुक

ग्लासगोतील चुकीच्या नकाशावर घेतला आक्षेप; विजयाच्या जल्लोषातही देशभान जपले

मुंबई (Winner Lovlina Borgohain) : ग्लासगोमध्ये भारताच्या नकाशातील गंभीर चूक निदर्शनास आणून देणारी भारताची स्टार बॉक्सर आणि रौप्यपदक विजेती लव्हलिना बोरगोहेन (Lovlina Borgohain) हिचे पंतप्रधान नरेंद्र मोदी (PM Narendra Modi) यांनी कौतुक केले. राष्ट्रकुल क्रीडा स्पर्धेतील पदकविजेत्या खेळाडूंशी मोदी यांनी आज संवाद साधला. यावेळी त्यांनी लव्हलिनाच्या प्रसंगावधानाचे विशेष कौतुक केले. राष्ट्रकुल क्रीडा स्पर्धेत भारताने बॉक्सिंगमध्ये १० पदके जिंकली होती.

या यशाचा आनंद साजरा करण्यासाठी भारतीय बॉक्सर ग्लासगोतील एका उपाहारगृहात गेले होते. तेथे मेन्यू पत्रिकेवर भारताचा चुकीचा नकाशा असल्याचे लव्हलिनाच्या निदर्शनास आले. या नकाशात ईशान्य भारताचा भागच दाखवण्यात आला नव्हता. (Lovlina Borgohain) लव्हलिनाने उपाहारगृह व्यवस्थापनाकडे हा मुद्दा नम्रपणे मांडला. ईशान्य भारताची नागरिक म्हणून हा नकाशा पाहून आपल्याला दुःख झाल्याचे तिने सांगितले. व्यवस्थापनाने तत्काळ चूक दुरुस्त करण्याचे आश्वासन दिले.

पंतप्रधान मोदींनी (PM Narendra Modi) संवादादरम्यान लव्हलिनाला, “तू उपाहारगृहाच्या मालकाशी भांडलीस का?” असा मिश्कील प्रश्न केला. त्यावर लव्हलिनाने हा आनंदाचा प्रसंग असल्याचे सांगत चुकीचा नकाशा दिसल्यानंतर आपण नम्रपणे आक्षेप घेतल्याचे स्पष्ट केले. मोदी म्हणाले, विजयाचा आनंद साजरा करत असतानाही देशाच्या नकाशाबाबत सजग राहणे हे शहाणपणाचे लक्षण आहे. हा प्रसंग लोक दीर्घकाळ लक्षात ठेवतील, असेही त्यांनी नमूद केले.