हिंगोली (Hingoli Suicide-affected farmer) : दुष्काळी परिस्थितीमुळे निर्माण झालेल्या आर्थिक संकटातून इसापूर-रमणा येथील शेतकरी विठ्ठल फकीरा वाढवे यांनी चार दिवसांपूर्वी टोकाचे पाऊल उचलत आत्महत्या केली. घरातील कर्त्या व्यक्तीच्या जाण्याने वाढवे कुटुंबावर दुःखाचा डोंगर कोसळला असून कुटुंबाची आर्थिक परिस्थिती अत्यंत नाजूक झाली आहे.
या (Hingoli Suicide-affected farmer) दुःखद घटनेची माहिती मिळताच सामाजिक कार्यकर्ते सचिन दराडे यांनी आज वाढवे कुटुंबाची सांत्वनपर भेट घेतली. यावेळी त्यांनी कुटुंबीयांशी संवाद साधून त्यांच्या अडचणी जाणून घेतल्या व किराणा साहित्य, गहू आणि जीवनावश्यक वस्तूंची मदत केली.
विशेष म्हणजे, विठ्ठल वाढवे यांच्या दोन मुली प्रसूतीसाठी माहेरी आलेल्या असताना कुटुंबावर हे संकट ओढवले आहे. त्यामुळे कुटुंबासमोर मोठे संकट उभे राहिले आहे. या परिस्थितीत केवळ तात्पुरती मदत न करता, वाढवे कुटुंबातील मुलाच्या डॉक्टर होण्याच्या स्वप्नासाठी त्याच्या शिक्षणाची संपूर्ण जबाबदारी सचिन दराडे यांनी स्वीकारली आहे. मुलाचे शिक्षण थांबू नये आणि त्याचे वैद्यकीय शिक्षण पूर्ण व्हावे यासाठी लागणारा शैक्षणिक खर्च आपण उचलणार असल्याचे त्यांनी सांगितले.
“एका कुटुंबावर संकट आले असताना समाज म्हणून त्यांच्या पाठीशी उभे राहणे ही आपली जबाबदारी आहे. आजची मदत ही केवळ किराणा किंवा धान्याची नसून, या कुटुंबाला पुन्हा उभे राहण्यासाठी दिलेला आधार आहे. मुलाच्या शिक्षणात परिस्थितीमुळे अडथळा येऊ नये, यासाठी मी त्याच्या शिक्षणाची जबाबदारी घेतली आहे,” अशी भावना सचिन दराडे यांनी व्यक्त केली.
यावेळी माजी जिल्हा परिषद सदस्य विठ्ठल चोतमल उपस्थित होते. दराडे यांनी दाखविलेल्या मानवतेचे परिसरातून कौतुक होत आहे.
