दिल्लीतील विद्यार्थी आंदोलनावरून भाजप आमदारांची प्रतिक्रिया; विरोधकांवर सरकारविरोधी वातावरण तयार करण्याचा आरोप
नवी दिल्ली / मुंबई : NEET पेपरफुटी प्रकरण आणि केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी दिल्लीत सुरू असलेल्या विद्यार्थी आंदोलनावरून भाजप आमदार सदाभाऊ खोत यांनी केलेल्या वक्तव्यामुळे नवा वाद निर्माण झाला आहे. आंदोलनकर्त्यांना 'आतंकवादी' अशी उपमा देत त्यांनी केंद्र सरकारने धर्मेंद्र प्रधान यांचा राजीनामा घेऊ नये, असे स्पष्टपणे म्हटले. त्यांच्या या वक्तव्यामुळे राजकीय वर्तुळात आरोप-प्रत्यारोपांना वेग आला असून सर्वसामान्यांकडूनही तीव्र प्रतिक्रिया उमटत आहेत.
दिल्लीत जंतरमंतर ते संसद असा विद्यार्थ्यांचा मोर्चा सोमवारी काढण्यात आला होता. मात्र, आंदोलनादरम्यान परिस्थिती तणावपूर्ण बनल्यानंतर पोलिसांनी लाठीचार्ज केला आणि अश्रुधूराचा वापर केला. या कारवाईत अनेक विद्यार्थी जखमी झाल्याची माहिती समोर आली आहे.
या पार्श्वभूमीवर बोलताना सदाभाऊ खोत यांनी NEET पेपरफुटी हे देशातील शांतता बिघडवण्यासाठी रचलेले मोठे षडयंत्र असल्याचा दावा केला. या प्रकरणात केंद्र सरकारने तातडीने कारवाई करून दोषींना अटक केली असून CBI चौकशीचे आदेश दिल्याचे त्यांनी सांगितले.
धर्मेंद्र प्रधान यांचा या प्रकरणाशी थेट संबंध नसल्याचा पुनरुच्चार करत खोत म्हणाले की, त्यांनी स्वतः चौकशीचे आदेश दिले आहेत. त्यामुळे त्यांच्या राजीनाम्याची मागणी योग्य नसल्याचे त्यांनी स्पष्ट केले.
यावेळी त्यांनी 'इंडिया' आघाडी आणि महाविकास आघाडीवरही निशाणा साधला. सोशल मीडिया आणि विविध माध्यमांतून सरकारविरोधी वातावरण तयार करण्यासाठी अफवा पसरवल्या जात असल्याचा आरोप त्यांनी केला. NEET परीक्षेशी संबंध नसलेले काही लोकही आंदोलनाच्या माध्यमातून राजकीय हेतू साधण्याचा प्रयत्न करत असल्याचा दावा त्यांनी केला.
दिल्लीतील आंदोलनाचा उल्लेख करताना सदाभाऊ खोत यांनी आंदोलकांविषयी वादग्रस्त भाष्य केले. आंदोलनाच्या पार्श्वभूमीवर काही शक्ती देशात अशांतता निर्माण करण्याचा प्रयत्न करत असल्याचा आरोप करत त्यांनी "आतंकवाद्यांना लोकशाहीच्या मार्गाने सरकारने उत्तर द्यावे" असे वक्तव्य केले.
तसेच, "केंद्रात नरेंद्र, महाराष्ट्रात देवेंद्र आणि शिक्षण खात्यात धर्मेंद्र... या व्यवस्थेत कोणताही बदल होणार नाही," असेही त्यांनी स्पष्ट केले. सरकारने केंद्रीय शिक्षणमंत्री धर्मेंद्र प्रधान यांचा राजीनामा घेऊ नये, अशी भूमिकाही त्यांनी पुन्हा मांडली.
