मोदी-शाह यांच्यात मतभेद असल्याचा राऊतांचा आरोप; शिवसेना पक्ष-चिन्हाच्या सुनावणीवरही निवडणूक आयोगावर निशाणा
केंद्रीय गृहमंत्री अमित शाह आणि पंतप्रधान नरेंद्र मोदी यांच्यात मतभेद असल्याचा दावा शिवसेना ठाकरे गटाचे खासदार संजय राऊत यांनी केला आहे. अमित शाह यांना देशाचे उपपंतप्रधान तसेच नरेंद्र मोदी यांचे वारसदार म्हणून घोषित व्हायचे होते; मात्र मोदींनी त्यास नकार दिल्याचा गंभीर आरोप राऊत यांनी केला. त्यांच्या या वक्तव्यामुळे राजकीय वर्तुळात चर्चेला उधाण आले आहे.
संसदेतील अमित शाह यांच्या अनुपस्थितीवर प्रश्न उपस्थित करताना राऊत यांनी हा दावा केला. अमित शाह यांना संसदेत येण्यापासून कोणी अडवले आहे, असा सवाल त्यांनी उपस्थित केला. मोदी आणि शाह यांच्यात मतभेद असल्याचे सांगत, शाह यांनी तातडीने उपपंतप्रधानपदाची मागणी केल्याचे राऊत म्हणाले.
#WATCH | Delhi: Shiv Sena (UBT) MP Sanjay Raut says, “No one is running away from the discussion… Amit Shah is a Member of Parliament and the Home Minister; who stopped you from coming inside? You ought to come in for the discussion…” pic.twitter.com/b0M6JvqtRL
— ANI (@ANI) August 13, 2026
आपल्याला मोदींचा वारसदार म्हणून घोषित करण्याची तसेच देशाच्या उपपंतप्रधानपदी नियुक्त करण्याची मागणी अमित शाह यांनी केल्याचा दावा संजय राऊत यांनी केला. मात्र, नरेंद्र मोदी यांनी ही मागणी स्पष्टपणे फेटाळल्याचेही ते म्हणाले. ‘आपण सांगत असलेली माहिती १०० टक्के सत्य आहे’, असा दावा राऊत यांनी केला.
संसदेच्या कामकाजावरूनही भाजपवर निशाणा
संसदेतील कामकाजाच्या मुद्द्यावर बोलताना संजय राऊत यांनी भाजपवर टीका केली. सर्व खासदारांनी सभागृहाची प्रतिष्ठा आणि शिस्त कायम ठेवली पाहिजे, असे त्यांनी म्हटले. भाजप स्वतःला शिस्त आणि नैतिकतेचे पालन करणारा पक्ष म्हणून मांडतो, त्यामुळे त्यांच्याकडूनही त्याच निकषांची अपेक्षा असल्याचे राऊत म्हणाले.
चर्चेपासून कोणीही दूर जाऊ नये, असे सांगत त्यांनी अमित शाह यांच्या संसदेत अनुपस्थित राहण्यावरही निशाणा साधला. यावेळी राऊत यांनी भाजपवर उपरोधिक टिप्पणी करत सरकारच्या भूमिकेवर टीका केली.
शिवसेना पक्ष आणि चिन्हाच्या सुनावणीवर राऊतांचा आरोप
दरम्यान, शिवसेना पक्ष आणि चिन्हाच्या प्रकरणातील सर्वोच्च न्यायालयातील सुनावणीवरही संजय राऊत यांनी भाष्य केले. या प्रकरणाची घटनापीठासमोर दुपारी 12 वाजता सुनावणी होणार असून, ती पुढील दिवसापर्यंत सुरू राहण्याची शक्यता असल्याचे त्यांनी सांगितले.
वरिष्ठ वकील कपिल सिब्बल यांनी मांडलेला युक्तिवाद महत्त्वाचा असल्याचे राऊत यांनी नमूद केले. विधिमंडळ पक्षातील गट विकत घेण्याची प्रवृत्ती वाढल्यास त्याचा परिणाम थेट संविधानावर होऊ शकतो, असा दावा त्यांनी केला.
शिवसेना पक्षाची स्थापना बाळासाहेब ठाकरे यांनी केली असून त्यांच्या हयातीतच पक्षाची जबाबदारी उद्धव ठाकरे यांच्याकडे सोपवण्यात आली आणि त्यानुसार पक्षाच्या घटनेत बदल करून त्याची माहिती निवडणूक आयोगाला देण्यात आल्याचे राऊत म्हणाले. असे असतानाही निवडणूक आयोगाची भूमिका घटनाबाह्य असल्याचा आरोप त्यांनी केला.
निवडणूक आयोगावर गंभीर आरोप
निवडणूक आयोग अमित शाह यांच्या दबावाखाली काम करत असल्याचा गंभीर आरोपही संजय राऊत यांनी केला. उद्धव ठाकरे, शरद पवार आणि तृणमूल काँग्रेसशी संबंधित पक्षांच्या प्रकरणांचा दाखला देत त्यांनी आयोगाच्या भूमिकेवर प्रश्नचिन्ह उपस्थित केले.
पक्षांच्या फुटीमागे ‘सेटिंग-बेटिंग’ असल्याचा आरोप करत राऊत यांनी आतापर्यंत चार पक्ष विकले गेल्याचे आणि या संपूर्ण प्रक्रियेत 5,000 कोटी रुपयांचा बाजार झाल्याचा दावा केला. अखेरीस संविधानाचा विजय होईल आणि निर्णय आपल्या बाजूने लागेल, असा विश्वासही त्यांनी व्यक्त केला.
