नवी दिल्ली (India Airport Development) : देशातील हवाई वाहतूक व्यवस्था अधिक सक्षम करण्यासाठी केंद्र सरकारने मोठी योजना आखली आहे. पुढील दहा वर्षांत देशभरात तब्बल 100 नवीन विमानतळ उभारण्याचे नियोजन करण्यात आले असून, या महत्त्वाकांक्षी योजनेसाठी जवळपास 30 हजार कोटी रुपयांचा खर्च केला जाणार आहे. केंद्रीय नागरी विमान वाहतूक मंत्री के. राममोहन नायडू यांनी या योजनेची माहिती दिली. देशातील विमानसेवा (India Airport Development) केवळ मोठ्या शहरांपुरती मर्यादित न राहता छोट्या शहरांमध्ये आणि दुर्गम भागांमध्येही पोहोचावी, हा या योजनेमागील प्रमुख उद्देश आहे.
छोट्या शहरांना विमानसेवेची जोडणी
सरकारच्या UDAN (उडे देश का आम नागरिक) योजनेच्या माध्यमातून प्रादेशिक हवाई संपर्क वाढवण्यावर भर दिला जाणार आहे. (India Airport Development) नवीन विमानतळांमुळे अनेक लहान आणि मध्यम शहरांना देशाच्या प्रमुख शहरांशी हवाई मार्गाने जोडण्यास मदत होईल. देशात विमान प्रवास करणाऱ्या प्रवाशांची संख्या सातत्याने वाढत आहे. त्यामुळे भविष्यातील वाढती मागणी लक्षात घेऊन विमानतळांची संख्या वाढवण्याचा निर्णय महत्त्वाचा मानला जात आहे.
पर्यटन आणि उद्योगालाही मिळणार चालना
नवीन विमानतळांमुळे (India Airport Development) केवळ प्रवाशांची सुविधा वाढणार नाही, तर संबंधित भागातील पर्यटन, उद्योग, व्यापार आणि रोजगाराच्या संधींनाही चालना मिळण्याची शक्यता आहे. दुर्गम आणि तुलनेने कमी विकसित भागांमध्ये हवाई संपर्क वाढल्याने त्या भागांच्या आर्थिक विकासालाही वेग मिळू शकतो. पुढील दशकात 100 नवीन विमानतळ विकसित करण्याची ही योजना पूर्ण झाल्यास देशातील हवाई वाहतुकीचे जाळे आणखी व्यापक होणार असून, भारताच्या विमान वाहतूक क्षेत्रासाठी हा मोठा टप्पा ठरण्याची शक्यता आहे.
