नवी दिल्ली (Explosive Found) : पंतप्रधान ननरेंद्र मोदी यांच्या बेंगळुरू दौऱ्यापूर्वी रविवारी मोठी सुरक्षा धास्ती निर्माण झाली. मुख्य कार्यक्रम स्थळाजवळ दोन जेलटिनच्या कांड्या आढळल्याने सुरक्षा यंत्रणांमध्ये खळबळ उडाली आहे.
बेंगळुरू येथील सेंट्रल रेंजचे डीआयजी यांनी दिलेल्या माहितीनुसार, रविवारी सकाळी सुरक्षा तपासणीदरम्यान या स्फोटक सामग्रीचा शोध लागला. पंतप्रधानांचा कार्यक्रम ज्या ठिकाणी होणार होता, त्या मुख्य स्थळापासून सुमारे ३ किलोमीटर अंतरावर पादचारी मार्गाच्या कडेला या जेलटिन कांड्या आढळल्या.
“तपासणीदरम्यान पादचारी मार्गाच्या बाजूला दोन जेलटिन कांड्या आढळल्या. त्या मुख्य कार्यक्रम स्थळापासून सुमारे ३ किमी अंतरावर होत्या. पुढील तपास सुरू आहे,” असे अधिकाऱ्यांनी सांगितले.
दरम्यान, यापूर्वीच गुप्तचर यंत्रणांनी संभाव्य दहशतवादी धोका लक्षात घेऊन दिल्ली मध्ये हाय अलर्ट जारी केला होता. त्यानंतर दिल्ली पोलीस आणि इतर सुरक्षा यंत्रणांनी संवेदनशील भागांमध्ये कडक नजर ठेवण्याचे आदेश दिले आहेत.
“संशयास्पद हालचाली, बेवारस वस्तू आणि संवेदनशील भागात उभ्या असलेल्या वाहनांवर कडक लक्ष ठेवण्याचे निर्देश पोलिसांना देण्यात आले आहेत,” असे अधिकाऱ्यांनी पीटीआयला सांगितले.
