एकाच आठवड्यात २.१५ कोटींचा मुद्देमाल जप्त, १५३ आरोपींवर कारवाई
चिखली (Buldhana Police) : बुलढाणा जिल्ह्यात अवैध धंद्यांचे प्रमाण वाढल्याबाबत बुलढाण्याचे आमदार संजय गायकवाड यांनी तक्रार केल्यानंतर, पोलीस प्रशासनाकडून गुन्हेगारांविरोधात मोठी मोहीम उघडण्यात आली आहे. पोलीस अधीक्षक निलेश तांबे यांच्या नेतृत्वात जिल्हा पोलीस दलाने गेल्या आठवडाभरात अवैध धंद्यांवर धडक कारवाई करत तब्बल २ कोटी १५ लाख ६७ हजार ३७० रुपयांचा मुद्देमाल जप्त केला आहे. या मोहिमेत विविध गुन्ह्यांत १५३ आरोपींवर कायदेशीर कारवाई करण्यात आली आहे.
आगामी महत्त्वाच्या सण-उत्सवांच्या पार्श्वभूमीवर जिल्ह्यातील कायदा व सुव्यवस्था अबाधित राहावी यासाठी ही कारवाई अधिक तीव्र करण्यात आल्याचे (Buldhana Police) पोलिसांच्या विशेष प्रसिद्धीपत्रकात नमूद करण्यात आले आहे.
झालेल्या कारवाईचा तपशील पुढीलप्रमाणे:
अवैध दारू कारवाई: अवैध देशी, विदेशी आणि गावठी हातभट्टी दारूविरुद्ध ७६ गुन्हे दाखल करून ७६ आरोपींना अटक करण्यात आली आहे. त्यांच्याकडून ३,९२,१८० रुपयांचा मुद्देमाल जप्त करण्यात आला.
जुगार कारवाई: जुगार ॲक्टनुसार २१ केसेस नोंदवून ६३ आरोपींना ताब्यात घेण्यात आले असून २,९९,३९० रुपयांचा मुद्देमाल हस्तगत करण्यात आला आहे.
आर्म ॲक्ट (बेकायदेशीर शस्त्रे): आर्म ॲक्ट अंतर्गत २ केसेस दाखल करून ४ आरोपींना अटक केली. आरोपींकडून १ पिस्तुल, १ मॅगझिन, १ चाकू, १ कोयता, २ मोटरसायकल व १ मोबाईल असा एकूण १,८६,३०० रुपयांचा ऐवज जप्त झाला.
NDPS Act (अवैध गांजा): गांजा बाळगणाऱ्यांविरुद्ध २ कारवाया करून २ आरोपींना अटक करण्यात आली. त्यांच्याकडून ५८,५०० रुपये किमतीचा १.१७० कि.ग्रॅ. गांजा जप्त करण्यात आला.
अवैध गौण खनिज (रेती चोरी): रेती चोरीच्या ४ केसेसमध्ये ८ आरोपींना वाहनांसह ताब्यात घेऊन तब्बल २,०६,३१,००० रुपयांचा मोठा मुद्देमाल जप्त केला आहे.
पोलीस अधीक्षक निलेश तांबे यांच्या मार्गदर्शनाखाली आठवडाभरात एकूण १०५ गुन्हे दाखल करत गुन्हेगारांचे धाबे दणाणले आहेत. जिल्ह्यातील अवैध धंद्यांविरोधातील ही मोहीम यापुढेही अशीच तीव्र रीतीने सुरू राहील, असा इशारा पोलीस प्रशासनाने दिला आहे.
