हिंगोली (Vighnaharta Chintamani Ganpati) : भक्ती, सेवा आणि संस्कार या त्रिसूत्रीवर कार्य करणाऱ्या स्वयंसिद्धा नारी मंचच्या द्वितीय वर्धापन दिनानिमित्त ऋषीपंचमीचे औचित्य साधून आज सोमवार दि. १५ सप्टेंबर रोजी सामूहिक श्री गणपती अथर्वशीर्ष पठण सोहळ्याचे भक्तिमय वातावरणात आयोजन करण्यात आले होते.
हिंगोली शहरातील गड्डे पीर गल्ली भागातील प्रसिद्ध श्री विघ्नहर्ता चिंतामणी गणपती मंदिरात सकाळी ७ ते ८ या वेळेत हा दिव्य सोहळा पार पडला. यावेळी शहरातील शेकडो महिला भक्तांनी केशरी साडी परिधान करून मोठ्या भक्तिभावाने या पठणात सहभाग घेतला. महिलांच्या एकसुरातील अथर्वशीर्ष पठणाने संपूर्ण मंदिर परिसर दुमदुमून गेला होता.
"एकत्र येऊया, अथर्वशीर्ष पठण करूया आणि श्री गणरायाच्या कृपेने जीवन मंगलमय करूया" या संकल्पनेतून या सोहळ्याचे आयोजन करण्यात आले होते. सकाळी ६.४५ वाजताच महिला भाविकांनी मंदिरात गर्दी केली होती.
गणपती बाप्पाच्या (Vighnaharta Chintamani Ganpati) जयघोषात आणि वैदिक मंत्रोच्चारात अतिशय मंगलमय वातावरणात हा कार्यक्रम संपन्न झाला. उपस्थित सर्व महिलांना श्री गणरायाचे आशीर्वाद प्राप्त झाले. या कार्यक्रमाचे आयोजन स्वयंसिद्धा नारी मंचच्या सर्व पदाधिकारी व सदस्यांनी यशस्वीरित्या केले.
