२७ ऑगस्ट रोजी विशेष सभा; अनेक नगरसेवक इच्छुक, अंतिम निर्णयाकडे लक्ष
वसमत : वसमत नगरपालिकेच्या उपाध्यक्षपदाची निवड करण्यासाठी मुहूर्त निश्चित झाला असून, २७ ऑगस्ट रोजी विशेष सभा आयोजित करण्यात आली आहे. मात्र, रिक्त उपाध्यक्षपदाची संधी नेमकी कोणाला मिळणार, हे अद्याप निश्चित झालेले नाही. त्यामुळे ‘मुहूर्त ठरला, पण उमेदवार ठरला नाही’, अशी परिस्थिती वसमतच्या राजकीय वर्तुळात निर्माण झाली आहे.
जिल्हाधिकाऱ्यांच्या आदेशानुसार वसमत नगरपालिकेच्या उपाध्यक्षपदाच्या निवडीसाठी नगरपरिषद सदस्यांची विशेष सभा बोलावण्यात आली आहे. ही सभा २७ ऑगस्ट रोजी वसमत नगरपालिका सभागृहात होणार असून, उपविभागीय अधिकारी विकास माने हे पिठासीन अधिकारी म्हणून उपस्थित राहणार आहेत.
नगर परिषदेचे उपाध्यक्ष सय्यद इमरान अली यांनी आपल्या पदाचा राजीनामा दिल्यामुळे उपाध्यक्षपद रिक्त झाले आहे. या रिक्त पदावर नवीन उपाध्यक्षांची निवड करण्यासाठी विशेष सभा आयोजित करण्यात आली आहे.
उपाध्यक्ष निवडीचा कार्यक्रम जाहीर झाला असला तरी या पदासाठी कोणाची निवड होणार, हे अद्याप स्पष्ट झालेले नाही. नगरपालिकेतील अनेक नगरसेवक या पदासाठी इच्छुक असून, प्रत्येक इच्छुक सदस्य आपली मागणी रेटण्यासाठी शिष्टमंडळ पाठवत असल्याचे दिसून येत आहे.
संधी कोणाला मिळणार?
वसमत नगरपालिकेच्या उपाध्यक्षपदावर वर्णी लागावी, यासाठी अनेक जण इच्छुक आहेत. इच्छुकांची संख्या मोठी असल्याने अखेर या पदाची संधी कोणाला मिळते, हे २७ ऑगस्ट रोजी आणि त्यावेळी स्पष्ट होणार आहे.
मात्र, इच्छुक अनेक असले तरी आमदार राजू पाटील नवघरे ठरवतील त्या सदस्यास उपाध्यक्षपदाची संधी मिळेल, यात शंका नसल्याचे राजकीय वर्तुळात बोलले जात आहे. त्यामुळे उपाध्यक्षपदाच्या निवडीकडे आता सर्वांचे लक्ष लागले आहे.
