घोटा गावच्या सरपंचपदापासून ते सहकार क्षेत्रातील नेतृत्वापर्यंतचा गौरवशाली प्रवास; तालुक्यावर शोककळा
रिसोड : रिसोड तालुक्यातील सहकार व राजकीय क्षेत्रातील ज्येष्ठ नेते, रिसोड कृषी उत्पन्न बाजार समितीचे दोन वेळा माजी सभापती राहिलेले तुकारामजी मोरे (वय ७८, रा. घोटा) यांचे दिनांक १९ सप्टेंबर रोजी वृद्धापकाळाने दुःखद निधन झाले. त्यांच्या निधनाने संपूर्ण रिसोड तालुका आणि घोटा परिसरातील सहकार चळवळीवर दुःखाचा डोंगर कोसळला आहे.
स्व. तुकारामजी मोरे यांनी घोटा ग्रामपंचायतीच्या सरपंचपदापासून आपल्या सार्वजनिक जीवनाची सुरुवात केली. ग्रामीण भागातील प्रश्नांची जाण आणि कार्यकर्त्यांशी नाळ जोडून ठेवण्याच्या हातोटीमुळे त्यांनी सहकार क्षेत्रात स्वतःची वेगळी ओळख निर्माण केली. रिसोड कृषी उत्पन्न बाजार समितीच्या सभापतीपदाची धुरा त्यांनी तब्बल दोन कार्यकाळ यशस्वीरीत्या सांभाळून शेतकऱ्यांच्या हिताचे अनेक निर्णय घेतले.
याशिवाय रामराव जनक जिनिंग प्रेसिंगचे अध्यक्षपद, अनंत सूतगिरणीचे संचालकपद तसेच रिसोड खरेदी-विक्री संघाचे विद्यमान संचालक म्हणून त्यांनी सहकार क्षेत्रात मोलाचे योगदान दिले.
त्यांचे चिरंजीव प्रदीप मोरे हे घोटा ग्रामपंचायतीचे सरपंच असताना आणि सूनबाई सौ. शैलाताई मोरे या उपसरपंच असताना प्रदीप यांचे अकाली अपघाती निधन झाले होते. या अत्यंत कठीण प्रसंगात माहेरचे (वडील बाळासाहेब खरात) कणखर संस्कार लाभलेल्या सूनबाई शैलाताई यांनी घराची संपूर्ण जबाबदारी आपल्या खांद्यावर घेतली.
गेल्या २० वर्षांपासून त्यांनी कौटुंबिक व्यवहारांसोबतच सासरे तुकारामजी मोरे यांची मातृवत व अत्यंत निष्ठापूर्वक सेवा केली, ज्याची परिसरात नेहमीच आदराने चर्चा होते.
त्यांच्या पश्चात सहा मुली, सून, नातवंडे असा मोठा आप्तपरिवार आहे. त्यांच्या निधनाची वार्ता समजताच विविध क्षेत्रांतील मान्यवर, राजकीय नेते, सहकार क्षेत्रातील पदाधिकारी व ग्रामस्थांनी घोटा येथे भेट देऊन मोरे कुटुंबीयांचे सांत्वन केले आणि स्व. तुकारामजी मोरे यांना भावपूर्ण श्रद्धांजली वाहिली.
