सिरसम बु. परिसरात बसची संख्या वाढविण्यासाठी विद्यार्थिंनीचा ठिय्या

सिरसम बु . परिसरात खराब बसने विद्यार्थिनी त्रस्त

खेर्डा (Sirsam Sudents Protest) : हिंगोली तालुक्यातील सिरसम बु. परिसरातून शाळेत ये-जा करणार्‍या विद्यार्थिनींना मानव विकास महामंडळाच्या खराब बसचा त्रास सहन करावा लागत आहे. त्यामुळे १८ जुलै शनिवार रोजी संतप्त विद्यार्थिनींनी ठिय्या मांडून चांगली बस पाठविण्याची आणि बसची संख्या वाढविण्याची मागणी केली.  गेल्या अनेक दिवसांपासून सिरसम बु. ते हिंगोली मार्गावर धावणारी मानव विकासची बस वारंवार बंद पडत आहे. बसच्या सीट तुटलेल्या आहेत, खिडक्यांच्या काचा गहाळ आहेत आणि पावसात आत पाणी गळते. त्यामुळे विद्यार्थिनींना बसण्यासाठी आणि उभे राहण्यासाठीही जागा मिळत नाही.

सकाळी आणि दुपारी शाळेच्या वेळी गर्दी वाढते. मात्र एकच बस असल्याने अनेक विद्यार्थिनींना बस न मिळाल्याने उशीर होतो किंवा खाजगी वाहनाने महागड्या दराने जावे लागते. शनिवारी सकाळी बस पुन्हा मध्येच बंद पडल्याने संतप्त झालेल्या विद्यार्थिनींनी बसस्थानकावरच ठिय्या मांडला. आम्हाला शिक्षणासाठी सुरक्षित आणि चांगली वाहतूक हवी आहे. ही भंगार बस बंद करा आणि नवीन बस द्या,अशी घोषणाबाजी विद्यार्थिनींनी केली.

त्यांनी मानव विकास महामंडळाकडे लेखी निवेदनही दिले. त्यात सिरसम बु. मार्गावर किमान २ बस सुरू कराव्यात आणि सध्याची खराब बस तातडीने बदलून नवीन बस पाठवावी अशी मागणी  विद्यार्थीनीने केली आहे. पालकांनीही या मागणीला पाठिंबा दिला आहे. मुलींच्या सुरक्षेचा प्रश्न आहे. रोज बस बंद पडली तर मुलींना रस्त्यात अडचण होत असल्याचे पालक सांगत आहेत  मागणी मान्य न झाल्यास आंदोलन तीव्र करण्याचा इशारा विद्यार्थिनींनीसह राष्ट्रवादी काँग्रेसचे आदीवासी सेलचे जिल्हाध्यक्ष गजानन ढाकरे यांनी दिला आहे दिला आहे.