चिखली : भारत निवडणूक आयोगाच्या विशेष सखोल पुनरीक्षण कार्यक्रम (Special Intensive Revision – SIR) अंतर्गत चिखली विधानसभा मतदारसंघात मतदार पडताळणीची प्रक्रिया सुरू होत आहे. या पार्श्वभूमीवर चिखली विधानसभा मतदारसंघाच्या आमदार श्वेता महाले यांनी सर्व मतदारांना या मोहिमेत सक्रिय सहभाग घेण्याचे आवाहन केले आहे.
भारत निवडणूक आयोगाच्या निर्देशानुसार येत्या दोन ते तीन दिवसांत प्रत्येक गावात व परिसरात मतदान केंद्रस्तरीय अधिकारी (BLO) यांच्या माध्यमातून SIR फॉर्मचे वाटप करण्यात येणार आहे. त्यामुळे मतदारांनी कोणतीही गैरसोय टाळण्यासाठी आवश्यक कागदपत्रे आधीच तयार ठेवावीत, असे आवाहन करण्यात आले आहे.
या मोहिमेसाठी आधार कार्ड, मतदार ओळखपत्र (Voter ID), चालू मोबाईल क्रमांक आणि दोन रंगीत पासपोर्ट आकाराचे फोटो ही कागदपत्रे आवश्यक असणार आहेत. विशेषतः पासपोर्ट आकाराचे दोन रंगीत फोटो उपलब्ध नसल्यास ते तातडीने काढून ठेवावेत, जेणेकरून फॉर्म भरताना कोणताही विलंब होणार नाही.
आमदार श्वेता महाले यांनी सांगितले की, मतदार यादी अधिक अचूक, अद्ययावत आणि पारदर्शक ठेवण्यासाठी भारत निवडणूक आयोग ही विशेष मोहीम राबवत आहे. त्यामुळे प्रत्येक पात्र मतदाराने BLO यांना सहकार्य करून आवश्यक माहिती वेळेत द्यावी. तसेच आपल्या कुटुंबातील आणि शेजारील मतदारांपर्यंतही ही माहिती पोहोचवून त्यांनाही या प्रक्रियेत सहभागी होण्यासाठी प्रोत्साहित करावे.
लोकशाही अधिक सक्षम आणि बळकट करण्यासाठी प्रत्येक नागरिकाचा सहभाग महत्त्वाचा आहे. त्यामुळे सर्व मतदारांनी या विशेष पुनरीक्षण मोहिमेला सकारात्मक प्रतिसाद देऊन आवश्यक कागदपत्रांसह सहकार्य करावे, असे आवाहनही आमदार श्वेता महाले यांनी केले आहे.
