'रणबली' आणि 'मैसा'च्या चित्रीकरणादरम्यान दुखापत; डॉक्टरांनी रिहॅबिलिटेशन थेरपीची शिफारस केली
मुंबई : अभिनेत्री रश्मिका मंदाना हिला चित्रपटातील नृत्य दृश्याचे चित्रीकरण करताना गंभीर दुखापत झाल्याची माहिती समोर आली आहे. या अपघातात तिच्या हिप टेंडनला पूर्णपणे इजा झाली असून डॉक्टरांनी तिला सहा आठवड्यांची विश्रांती घेण्याचा सल्ला दिला आहे. या दुखापतीमुळे तिच्या आगामी चित्रपटांचे चित्रीकरण काही काळासाठी पुढे ढकलले जाण्याची शक्यता आहे.
माहितीनुसार, रश्मिका तिच्या आगामी 'रणबली' आणि 'मैसा' या चित्रपटांतील आव्हानात्मक ॲक्शन आणि डान्स सिक्वेन्सचे शूटिंग करत होती. याच दरम्यान तिला गंभीर दुखापत झाली. त्यामुळे सध्या तिच्या उपचारांवर आणि पूर्णपणे बरे होण्यावर भर दिला जात आहे.
रश्मिकाच्या दुखापतीबाबत डॉक्टरांनीही चिंता व्यक्त केली आहे. त्यांच्या म्हणण्यानुसार, अशा प्रकारची दुखापत सामान्यतः अत्यंत कठोर प्रशिक्षण घेणाऱ्या व्यावसायिक खेळाडू किंवा प्रशिक्षित व्यक्तींमध्ये आढळते. त्यामुळे शूटिंगला परतण्यापूर्वी तिने आवश्यक रिहॅबिलिटेशन थेरपी पूर्ण करावी, असा वैद्यकीय सल्ला देण्यात आला आहे.
दरम्यान, अभिनेता विजय देवराकोंडा याच्याशी विवाहानंतर रश्मिकाने तिच्या नव्या 'मैसा' चित्रपटाचे चित्रीकरण पुन्हा सुरू केले होते. तिने या ॲक्शन-थ्रिलर चित्रपटाच्या सेटवरील काही झलकही सोशल मीडियावर शेअर केल्या होत्या.
रवींद्र पुल्ले दिग्दर्शित आणि अनफॉर्म्युला फिल्म्स निर्मित 'मैसा' हा चित्रपट गोंड जमातीच्या सांस्कृतिक पार्श्वभूमीवर आधारित भावनिक ॲक्शन-थ्रिलर असल्याचे सांगितले जाते. या चित्रपटात रश्मिका एका गोंड स्त्रीची भूमिका साकारत असून, तिच्या कारकिर्दीतील ही एक वेगळी आणि धाडसी भूमिका मानली जात आहे.
याशिवाय, प्रजासत्ताक दिनाच्या निमित्ताने रश्मिका आणि तिचा अभिनेता-पती विजय देवराकोंडा यांच्या 'रणबली' या चित्रपटाचे शीर्षक आणि जागतिक प्रदर्शनाची तारीख जाहीर करण्यात आली होती. राहुल संकृतियन दिग्दर्शित हा चित्रपट ११ सप्टेंबर रोजी प्रदर्शित होणार असून त्याबाबत चाहत्यांमध्ये मोठी उत्सुकता आहे.
मात्र, सेटवर झालेल्या दुखापतीसंदर्भात रश्मिका मंदाना किंवा तिच्या टीमकडून अद्याप कोणतेही अधिकृत निवेदन जारी करण्यात आलेले नाही.
