चेक बाऊन्स प्रकरणात न्यायालयीन कारवाईनंतर आता सेंट्रल बँक ऑफ इंडियाकडून 9 सप्टेंबरला दोन गहाण मालमत्तांचा लिलाव; सेटलमेंटची चर्चा सुरू असल्याचा दावा
बॉलिवूड अभिनेता राजपाल यादव यांच्या अडचणी आणखी वाढल्या आहेत. चेक बाऊन्स प्रकरणात न्यायालयाने दोषी ठरवल्यानंतर आता त्यांच्या दोन गहाण मालमत्तांच्या लिलावाची प्रक्रिया सुरू झाली आहे. सेंट्रल बँक ऑफ इंडियाने कर्जाची थकबाकी न भरल्यामुळे या मालमत्तांचा ताबा घेतला असून 9 सप्टेंबर रोजी त्यांचा लिलाव करण्यात येणार असल्याची नोटीस जारी करण्यात आली आहे.
यापूर्वी 10 जुलै रोजी चेक बाऊन्स प्रकरणात दिल्ली उच्च न्यायालयाने राजपाल यादव यांना दोषी ठरवत कारावासाची शिक्षा सुनावली होती. त्यानंतर आता मालमत्तांच्या लिलावाची कारवाई सुरू झाल्याने अभिनेत्याला आणखी एक मोठा धक्का बसला आहे.
कोणत्या मालमत्तांचा होणार लिलाव?
बँकेकडून लिलावासाठी ठेवण्यात आलेल्या दोन मालमत्तांपैकी एक शाहजहांपूर येथील कचहरी रोड परिसरात आहे, तर दुसरी मुंबईतील वांद्रे आणि वांद्रे-कुर्ला कॉम्प्लेक्स (BKC) परिसरात आहे. या दोन्ही मालमत्ता कर्ज घेताना गहाण ठेवण्यात आल्या होत्या.
राजपाल यादव यांनी पत्नी राधा यादव आणि आई गोदावरी यांच्या नावावर सेंट्रल बँक ऑफ इंडियाच्या मुंबई शाखेकडून 16.61 कोटी रुपयांचे कर्ज घेतले होते. मात्र, नियोजित वेळेत कर्जाची परतफेड न झाल्याने बँकेने कायदेशीर प्रक्रिया सुरू केली. दोन वर्षांपूर्वीही यासंदर्भात नोटीस बजावण्यात आली होती आणि परतफेडीसाठी चर्चा झाली होती.
कर्ज थकीत राहण्यामागील कारण काय?
मीडिया रिपोर्टनुसार, हे संपूर्ण प्रकरण 2012 मध्ये प्रदर्शित झालेल्या 'अता पता लापता' या चित्रपटाशी संबंधित आहे. या चित्रपटाचे दिग्दर्शन स्वतः राजपाल यादव यांनी केले होते. चित्रपटाच्या निर्मितीसाठी सेंट्रल बँक ऑफ इंडियाकडून कर्ज घेण्यात आले होते.
मात्र, हा चित्रपट बॉक्स ऑफिसवर अपयशी ठरल्यानंतर कर्जाची परतफेड वेळेवर होऊ शकली नाही. कालांतराने व्याज वाढत गेले आणि थकीत रकमेचा आकडा 16 कोटी रुपयांपेक्षा अधिक झाला.
राजपाल यादव यांची प्रतिक्रिया काय?
मालमत्तांच्या लिलावाबाबत राजपाल यादव यांनी अद्याप कोणतीही अधिकृत प्रतिक्रिया दिलेली नाही. मात्र, त्यांचे मोठे भाऊ श्रीपाल यादव यांनी हे प्रकरण जुने असल्याचे सांगत बँकेसोबत सेटलमेंटसंदर्भात चर्चा सुरू असल्याची माहिती दिली आहे.
प्रकरणाची पार्श्वभूमी
2010 मध्ये राजपाल यादव यांनी त्यांच्या निर्मितीतील 'अता पता लापता' या चित्रपटासाठी सुमारे 5 कोटी रुपयांचे कर्ज घेतले होते. चित्रपट अपयशी ठरल्यानंतर ते कर्जाची वेळेत परतफेड करू शकले नाहीत. त्यानंतर दिलेले अनेक चेक बाऊन्स झाल्याने त्यांच्याविरोधात न्यायालयीन लढाई सुरू झाली.
यापूर्वीही या प्रकरणात त्यांना तुरुंगवास भोगावा लागला होता. थकीत रक्कम फेडण्याचे अनेकदा आश्वासन दिल्यानंतरही ती पूर्ण न झाल्याने दिल्ली उच्च न्यायालयाने दोषसिद्धी कायम ठेवत तीन महिन्यांच्या कारावासाचा निर्णय कायम ठेवला. दरम्यान, कर्जाची संपूर्ण परतफेड अद्याप न झाल्यामुळे आता त्यांच्या गहाण मालमत्तांचा लिलाव होणार आहे.
