शाळेत गेलेली १४ वर्षीय मुलगी बेपत्ता; पातूर पोलिसांत गुन्हा दाखल

पातूर (Patur Girl Missing Case) : पातूर शहरातील एका १४ वर्षीय विद्यार्थिनीचा शाळेत गेल्यानंतर बेपत्ता झाल्याची घटना समोर आली असून, याप्रकरणी पातूर पोलिस ठाण्यात भारतीय न्याय संहिता (बीएनएस) कलम १३७(२) अन्वये गुन्हा दाखल करण्यात आला आहे.

पोलिसांनी दिलेल्या माहितीनुसार, पातूर येथील एका रहिवाशाने दिलेल्या तक्रारीत म्हटले आहे की, त्यांची १४ वर्षीय मुलगी १३ जुलै २०२६ रोजी सकाळी सुमारे १० वाजता शाळेत जात असल्याचे सांगून घरातून निघाली. मात्र सायंकाळी घरी परत न आल्याने कुटुंबीयांनी नातेवाईक व परिचितांकडे शोध घेतला. सर्वत्र शोध घेऊनही मुलगी आढळून न आल्याने अखेर पातूर पोलिस ठाण्यात तक्रार दाखल करण्यात आली.

तक्रारीच्या आधारे पातूर पोलिसांनी बीएनएस कलम १३७(२) अंतर्गत गुन्हा दाखल केला आहे. या प्रकरणाची नोंद पोलीस निरीक्षक रामकृष्ण जाधव यांच्या मार्गदर्शनाखाली करण्यात आली असून, पुढील तपास पातूर पोलीस करीत आहेत.

दरम्यान, (Patur Girl Missing Case) बेपत्ता मुलीचा शोध घेण्यासाठी पोलिसांकडून विविध ठिकाणी शोधमोहीम सुरू करण्यात आली असून, नागरिकांनी संबंधित मुलीबाबत कोणतीही माहिती मिळाल्यास तातडीने पातूर पोलिस ठाण्याशी संपर्क साधण्याचे आवाहन करण्यात आले आहे.