वेतनासाठी वाढीव जीएसटी अनुदानाची मागणी; शाखा अभियंता यांच्या कार्यालयासमोर घोषणाबाजी
परभणी (Parbhani Municipal Employee) : मनपाच्या कर्मचारी, सेवानिवृत्त कर्मचारी यांचे मागील पाच महिन्यापासून वेतन थकले आहे. वेतनासाठी वाढीव जीएसटी अनुदान द्यावे, फरकाची थकित रक्कम तात्काळ देण्यात यावी, अशी मागणी करत सोमवार १० ऑगस्ट रोजी कर्मचार्‍यांनी आक्रमक भूमिका घेत धरणे आंदोलन केले. कार्यालय परिसरात प्रचंड घोषणाबाजी करत कर्मचार्‍यांनी रोष व्यक्त केला.
गेल्या पाच, सहा महिन्यापासून मनपा कर्मचार्‍यांचे वेतन थकले आहे. नियमित वेतनासाठी महाराष्ट्र राज्य नगर पालिका, नगर पंचायत संवर्ग अधिकारी, कर्मचारी संघटनेने सतत शासन दरबारी प्रश्न मांडला. (Parbhani Municipal Employee) परभणी मनपाला जीएसटी अनुदान कमी येत असल्याने वेतन अदा करण्यास विलंब होत असल्याचे कारण पुढे केले जाते. संघटनेने वाढीव अनुदानाचा प्रस्ताव शासनाकडे सादर केला होता. हा प्रस्ताव मंजूरीसाठी शासनाने ४ नोव्हेंबर २०२५ रोजी समिती गठीत केली. मात्र अद्यापही वाढीव जीएसटी अनुदानाचा प्रश्न सोडवला नाही.
शिवाय फरकाची रक्कमही दिली नाही. त्यामुळे कर्मचार्‍यांवर उपासमारीची वेळ आली आहे. वारंवार पाठपुरावा करुनही वाढीव जीएसटी अनुदानात वाढ होत नाही. त्यामुळे सोमवार १० ऑगस्ट रोजी कर्मचार्‍यांनी आक्रमक भूमिका घेत आंदोलन केले. शाखा अभियंता यांच्या कार्यालयास घेराव घालून घोषणाबाजी केली. दरम्यान महापौर सय्यद इकबाल यांनी कर्मचार्‍यांशी संवाद साधून आंदोलनास पाठिंबा दिला.
या (Parbhani Municipal Employee) आंदोलनात संघटनेचे अध्यक्ष नासेर खान वहिद खान, अनुसयाबाई जोगदंड, के.के. भारसाखळे, व्ही.एस. उफाडे, विजय ठाकूर, खाजा मोईन खान, विश्वनाथ गोबाडे, अभिजीत कुलकर्णी, सिताबाई तांबे, शोभा सालगुडे, नंदाबाई सोनवणे, गुलाबबाई मदेवाड आदींसह कर्मचारी मोठ्या संख्येने सहभागी झाले होते.
