महाविकास आघाडीकडून डॉ. विवेक नावंदर, महायुतीकडून सईद खान यांना उमेदवारी
परभणी (Parbhani Assembly Election) : परभणी - हिंगोली विधान परिषद निवडणूकीसाठी उमेदवारी अर्ज दाखल करण्याच्या शेवटच्या दिवशी सोमवार १ जून महाविकास आघाडी, महायुतीच्या उमेदवारांसह सात जणांनी अर्ज दाखल केले आहे.
परभणी - हिंगोली विधान परिषद निवडणूकीसाठी (Parbhani Assembly Election) २१ जून रोजी मतदान होणार आहे. त्या करीता उमेदवारी अर्ज दाखल करण्याची सोमवार १ जून रोजी अंतिम मुदत होती. त्यामुळे महायुती, महाविकास आघाडीने आपले उमेदवार जाहिर केले आहे. महाविकास आघाडीकडून उबाठाचे डॉ. विवेक नावंदर यांची उमेदवारी जाहिर झाली आहे. त्यांनी उबाठा, काँग्रेसच्या जेष्ठ मंडळीसोबत अर्ज दाखल केला. यावेळी खा. संजय जाधव, आ.डॉ. राहूल पाटील, महापौर सय्यद इकबाल, सिध्दार्थ हत्तीअंबीरे, काँग्रेस जिल्हाध्यक्ष बाबाजानी दुर्राणी, महानगर जिल्हाध्यक्ष रविराज देशमुख यांची उपस्थिती होती. महायुतीकडून शिवसेना शिंदे गटाचे सईद खान यांनी उमेदवारी अर्ज दाखल केला आहे.
यावेळी सामाजिक न्याय मंत्री संजय सिरसाठ, पालकमंत्री ना. मेघनाताई बोर्डीकर, माजी मंत्री सुरेश वरपूडकर, आ. संजय बांगर, नगराध्यक्ष आसेफ खान आदींची उपस्थिती होती. राष्ट्रवादी काँग्रेसचे मनपा सदस्य विजयसिंह जामकर यांनी देखील उमेदवारी दाखल केली. यावेळी मनपा सदस्य आकाश लहाने, अक्षय देशमुख, अर्जुन सामाले उपस्थित होते. काँग्रेसचे माजी आ. सुरेश देशमुख यांचे चिरंजीव सुशिल देशमुख यांनी उमेदवारी दाखल केली.
यावेळी माजी खा. तुकाराम रेंगे, भगवान वाघमारे, मनपा सदस्य सुनिल देशमुख, गुलमिर खान, नदीम इनामदार आदींची उपसिथती होती. या शिवााय विश्वजीत बुधवंत, संग्राम जामकर आणि मेहराज खान शेरगुल खान पठाण यांनीही अर्ज दाखल केले आहे. विद्यमान आ. विप्लव बाजोरीया यांची जोरदार चर्चा होती. मात्र त्यांना उमेदवारी मिळाली नाही.अर्जांची छाननी मंगळवार २ जून रोजी होणार आहे. ४ जून उमेदवारी अर्ज मागे घेण्याचा अंतिम दिनांक आहे. त्यानंतर अंतिम चित्र स्पष्ट होणार आहे.
