पांदन रस्त्यावरील अतिक्रमण हटवा; तहसीलदार यांना निवेदन 

मानोरा (Pandan Road Encroachment) : तालुक्यातील उमरी खुर्द येथील शामकी माता ते वाघामाय जुन्या पांदन रस्त्यावरील अतिक्रमण तातडीने हटवून रस्ता कायमस्वरूपी खुला करावा, अशी मागणीचे निवेदन तहसिलदार यांना शेतकरी राजेश बाबुराव राठोड यांच्यासह ७७ शेतकऱ्यांनी दिले आहे. 
 
निवेदनात कास्तकारांनी म्हटले आहे की, खरीप पेरणी हंगाम तोंडावर आला असताना पांदण रस्त्यावरील अतिक्रमणामुळे शेती मशागतीच्या कामाला अडथळा निर्माण झाला आहे. पेरणी हंगाम असल्यामुळे शामकी माता मंदिराजवळील दुकान व इतरांनी पांदन रस्त्यावर केलेले अतिक्रमण हटविल्याशिवाय कास्तकारांच्या पेरणीच्या कामात मोठा अडथळा येत आहे. शेत मशागतीसाठी ट्रॅक्टर, बैलजोडी व इतर अवजारे घेऊन जाण्यास रस्ता उपलब्ध नसल्याने पेरणी वेळेवर होणार नसल्याची भीती व्यक्त केली जात आहे.  

कास्तकारांनी यापूर्वीही या प्रश्नासाठी पाठपुरावा केला आहे.  मात्र या दोन्ही अर्जांची अद्याप दखल घेण्यात आली नाही. पेरणी हंगाम हा शेतकऱ्यांसाठी अत्यंत महत्त्वाचा काळ आहे. रस्ता बंद असल्याने वेळेवर पेरणी न झाल्यास उत्पादनावर मोठा परिणाम होणार आहे. त्यामुळे शामकी माता मंदिराजवळील अतिक्रमण त्वरित हटवून पांदन रस्ता कायमस्वरूपी खुला करावा," अशी मागणीचे निवेदन पिडित शेतकऱ्यांनी दिले आहे. प्रशासनाने यावर तातडीने लक्ष घालून अतिक्रमण हटवावे, अन्यथा आंदोलनाचा इशारा शेतकऱ्यांनी दिला आहे.  

शामकी माता मंदीर ते वाघमाय २ किलोमीटर पांदण रस्त्याला महात्मा गांधी राष्ट्रीय ग्रामीण रोजगार हमी योजनेअंतर्गत मातोश्री ग्राम समृद्धी पांदण रस्त्याचे सन २० डिसेंबर २०२२ मधील यादीत नाव समावेश करण्यात आला आहे. मात्र अद्यापही रस्त्याचे काम सुरू झालेले नाही. त्यामुळे रस्त्यावरील (Pandan Road Encroachment) अतिक्रमण हटवून रस्ता काम मार्गी लावून न्याय द्यावा!
-राजेश राठोड, शेतकरी उमरी खुर्द