हिंगोलीचे आगार प्रमुख किशोर महाजन यांची माहिती
हिंगोली (NCMC Card) : महाराष्ट्र राज्य मार्ग परिवहन महामंडळा तर्फे सवलतधारी व विना सवलतधारी प्रवाशांसाठी एनसीएमसी कार्ड देण्याची प्रक्रिया सुरू असली तरी सध्या या कार्डाची प्रवासासाठी सक्ती करण्यात आलेली नाही, असे स्पष्टीकरण हिंगोली आगार प्रशासनाने दिले आहे. अमृत ज्येष्ठ नागरिक, महिला सन्मान योजना तसेच दिव्यांग प्रवाशांसाठी एनसीएमसी कार्ड उपलब्ध करून देण्यात येत आहे. मात्र हे कार्ड सक्तीचे होणार असल्याच्या अनधिकृत बातम्या प्रसार माध्यमांवर येत असल्याने प्रवाशांमध्ये संभ्रम निर्माण झाला आहे.
या (NCMC Card) पार्श्वभूमीवर रा. प. हिंगोली आगाराने वस्तुस्थिती स्पष्ट केली. आगार प्रशासनाने कळविले की, सध्या आधार कार्ड, पॅन कार्ड, मतदान कार्ड इत्यादी अधिकृत ओळखपत्रे सवलतीसाठी वैध धरण्यात येत आहेत. एनसीएमसी कार्ड नसल्यास प्रवाशांना कोणतीही अडचण येणार नाही व सवलत नाकारली जाणार नाही. एनसीएमसी कार्डची नोंदणी प्रक्रिया सुरू असून ८० टक्के नागरिकांची नोंदणी पूर्ण झाल्यानंतरच कार्डबाबत अधिकृत घोषणा महामंडळामार्फत करण्यात येणार आहे.
तत्पूर्वी कोणतीही सक्ती लागू होणार नसल्याचे आगाराने स्पष्ट केले आहे. त्यामुळे प्रवाशांनी अफवांवर विश्वास न ठेवता जवळचे अधिकृत (NCMC Card) ओळखपत्र दाखवून सवलतीच्या दरात रा. प. बसने प्रवास करावा, असे आवाहन हिंगोली आगार व्यवस्थापक किशोर महाजन यांनी केले आहे. एनसीएमसी कार्डबाबत भविष्यातील निर्णय महामंडळाच्या अधिकृत परिपत्रकाद्वारे कळविण्यात येईल, असेही त्यांनी सांगितले.
