संत-महंत, लोकप्रतिनिधी, प्रशासन, पोलीस, शैक्षणिक संस्था, सामाजिक व सेवाभावी संघटनांच्या सक्रिय सहभागाचे आवाहन
जळगाव : युवा शक्ती ही देशाची सर्वात मोठी ताकद असून, ही शक्ती नशेपासून दूर ठेवून शिक्षण, क्रीडा, कौशल्य, रोजगार, सेवा आणि राष्ट्रनिर्मितीच्या कार्याकडे वळविणे आवश्यक आहे. त्यामुळे ‘नशामुक्त युवा – विकसित भारत संकल्प अभियान’ हे केवळ शासकीय अभियान न राहता व्यापक जनआंदोलनाच्या स्वरूपात राबविण्याचे आवाहन केंद्रीय राज्यमंत्री श्रीमती रक्षाताई खडसे यांनी केले.
जळगाव जिल्हाधिकारी कार्यालयात ‘नशामुक्त युवा – विकसित भारत संकल्प अभियान’ अंतर्गत केंद्रीय राज्यमंत्री रक्षाताई खडसे यांच्या अध्यक्षतेखाली महत्त्वपूर्ण कार्यक्रमाचे आयोजन करण्यात आले. यावेळी त्यांनी व्हिडिओ कॉन्फरन्सिंगद्वारे उपस्थितांना मार्गदर्शन केले. अभियानाची उद्दिष्टे स्पष्ट करताना समाजातील प्रत्येक घटकाने नशामुक्त समाजनिर्मितीसाठी सक्रिय सहभाग घेण्याची गरज त्यांनी अधोरेखित केली.
१०० आठवड्यांचे राष्ट्रव्यापी जनआंदोलन
‘नशामुक्त युवा – विकसित भारत संकल्प अभियान’ हे १०० आठवडे चालणारे राष्ट्रव्यापी जनआंदोलन आहे. युवकांना नशेच्या दुष्परिणामांपासून दूर ठेवणे आणि सन २०४७ पर्यंत ‘विकसित भारत’ चे स्वप्न साकार करण्यासाठी शारीरिक व मानसिकदृष्ट्या निरोगी, सक्षम आणि सशक्त पिढी घडविणे, हा या अभियानाचा प्रमुख उद्देश आहे.
या माध्यमातून देशभरातील युवकांमध्ये नशामुक्तीबाबत जनजागृती निर्माण करून त्यांना सकारात्मक उपक्रम तसेच राष्ट्रनिर्मितीच्या कार्याशी जोडण्याचा प्रयत्न केला जात आहे.
जनजागृतीसोबत कुटुंब आणि समाजाचा सहभाग महत्त्वाचा
नशेचे वाढते दुष्परिणाम रोखण्यासाठी केवळ कायदेशीर कारवाई पुरेशी नसल्याचे यावेळी नमूद करण्यात आले. त्यासाठी जनजागृती, समुपदेशन, कुटुंबाचा सहभाग, शैक्षणिक संस्थांची भूमिका आणि समाजातील विविध घटकांचा सक्रिय सहभाग आवश्यक आहे.
युवा पिढीला व्यसनांपासून दूर ठेवण्यासाठी त्यांना क्रीडा, शिक्षण, कौशल्य विकास, रोजगार आणि सकारात्मक सामाजिक उपक्रमांशी जोडण्यावर भर देण्याचे आवाहन करण्यात आले.
प्रत्येक गाव, कुटुंब आणि युवकापर्यंत नशामुक्तीचा संदेश
जळगाव जिल्ह्यातील प्रत्येक गाव, प्रत्येक कुटुंब आणि प्रत्येक युवकापर्यंत नशामुक्तीचा संदेश पोहोचविण्याचे आवाहन करण्यात आले. नशामुक्त समाज उभारण्यासाठी संत-महंत, धार्मिक संस्था, लोकप्रतिनिधी, प्रशासन, पोलीस विभाग, शैक्षणिक संस्था, सेवाभावी संघटना, सामाजिक कार्यकर्ते आणि नागरिकांनी एकत्रितपणे पुढाकार घेण्याची गरज व्यक्त करण्यात आली.
माननीय पंतप्रधान श्री नरेंद्र मोदी जी यांच्या आवाहनातून सुरू झालेल्या या राष्ट्रव्यापी अभियानाला जळगाव जिल्ह्यात व्यापक जनसहभागातून बळ देण्याचे आवाहन केंद्रीय राज्यमंत्री रक्षाताई खडसे यांनी केले. युवकांना व्यसनमुक्त, निरोगी, सक्षम आणि राष्ट्रनिर्मितीसाठी सज्ज करण्यासाठी प्रत्येकाने योगदान द्यावे, असे त्यांनी सांगितले.
मान्यवरांची उपस्थिती
या कार्यक्रमाला महामंडलेश्वर जनार्दन हरीजी महाराज, वस्त्रोद्योग मंत्री श्री. संजय सावकारे, आमदार श्री. सुरेश (राजूमामा) भोळे, जिल्हाधिकारी रोहन घुगे, पोलीस अधीक्षक श्रीकांत धिवरे यांच्यासह संत-महंत, लोकप्रतिनिधी, विविध शासकीय विभागांचे अधिकारी, सेवाभावी संस्था, सामाजिक संघटनांचे पदाधिकारी आणि मान्यवर उपस्थित होते.
नशामुक्त युवा हीच विकसित भारताची खरी ताकद आहे. सन २०४७ पर्यंत विकसित भारताचे स्वप्न साकार करण्यासाठी आजच्या युवा पिढीला नशामुक्त, शारीरिक व मानसिकदृष्ट्या निरोगी आणि सक्षम बनविणे ही सामूहिक जबाबदारी असल्याचा संदेश यावेळी देण्यात आला.
