९३ रुपयांचे दूध आता १०२ रुपयांना; वाढीव दर २८ फेब्रुवारी २०२७ पर्यंत लागू राहणार
मुंबई : सणासुदीच्या पार्श्वभूमीवर मुंबईकरांच्या घरगुती खर्चात आणखी वाढ होण्याची शक्यता आहे. मुंबईत दुधाच्या दरात मोठी वाढ करण्याचा निर्णय दूध उत्पादकांनी घेतला असून, १ सप्टेंबर २०२६ पासून प्रति लिटर ९ रुपयांनी दर वाढणार आहेत. त्यामुळे सध्या ९३ रुपये लिटर असलेल्या दुधासाठी ग्राहकांना आता १०२ रुपये मोजावे लागणार आहेत.
मुंबईतील घाऊक आणि किरकोळ दूध उत्पादकांकडून ही दरवाढ करण्यात आली आहे. नव्या दरांची अंमलबजावणी १ सप्टेंबरपासून सुरू होऊन २८ फेब्रुवारी २०२७ पर्यंत हे दर कायम राहणार असल्याचे दूध उत्पादकांनी स्पष्ट केले आहे. अचानक झालेल्या या वाढीमुळे मुंबईतील सर्वसामान्य कुटुंबांच्या मासिक बजेटवर अतिरिक्त आर्थिक भार पडण्याची शक्यता आहे.
दूध उत्पादनाचा खर्च वाढल्याने दरवाढीचा निर्णय घ्यावा लागल्याचे उत्पादकांकडून सांगण्यात आले आहे. बाजारातील पेंड, पशुखाद्य आणि जनावरांच्या चाऱ्याच्या खर्चात झालेली वाढ यामुळे दूध उत्पादनाचा एकूण खर्च मोठ्या प्रमाणात वाढला आहे. वाढत्या महागाईच्या पार्श्वभूमीवर उत्पादन खर्च आणि विक्रीदर यातील तफावत भरून काढणे आवश्यक झाल्याने दर वाढवण्याचा निर्णय घेतल्याचे उत्पादकांचे म्हणणे आहे.
उत्पादन व्यवसाय आर्थिकदृष्ट्या टिकवून ठेवण्यासाठी हा निर्णय घेणे अपरिहार्य ठरल्याचे दूध उत्पादकांनी नमूद केले आहे. मात्र, या दरवाढीचा थेट परिणाम ग्राहकांवर होणार असून मुंबईकरांना रोजच्या दूधखरेदीसाठी अधिक रक्कम खर्च करावी लागणार आहे. सणासुदीच्या काळात झालेल्या या वाढीमुळे आधीच वाढलेल्या घरगुती खर्चात आणखी भर पडण्याची शक्यता आहे.
