मुंबई (Mumbai Infrastructure): देशाची आर्थिक राजधानी असलेल्या मुंबईत सध्या पायाभूत सुविधांचा वेगाने विस्तार सुरू आहे. सागरी मार्ग, पूल आणि भूमिगत प्रकल्पांच्या माध्यमातून शहरात मोठे बदल घडत असून येत्या 50 वर्षांत मुंबई सिंगापूर किंवा दुबईसारख्या जागतिक शहरांना टक्कर देईल का, असा प्रश्न उपस्थित केला जात आहे. शहराच्या विकासासाठी सुमारे 60 अब्ज डॉलरची गुंतवणूक करण्यात आली असून वाहतूक व्यवस्था अधिक सक्षम करण्यावर भर दिला जात आहे.
सागरी सेतू आणि कोस्टल रोडने प्रवास वेगवान
या परिवर्तनातअटल सेतू हा महत्त्वाचा टप्पा ठरला आहे. 21.8 किमी लांबीचा हा देशातील सर्वात मोठा सागरी पूल दक्षिण मुंबईला नवी मुंबईशी जोडतो. यामुळे एक तासाचा प्रवास आता अवघ्या 20 मिनिटांत पूर्ण होतो.
तसेच कोस्टल रोडच्या पहिल्या टप्प्यामुळे Marine Drive ते वरळी दरम्यानचा प्रवास 40 मिनिटांवरून 12 मिनिटांवर आला आहे.
मेट्रो नेटवर्कचा झपाट्याने विस्तार
मुंबईतील मेट्रो नेटवर्कने 100 किमीचा टप्पा पार केला असून पुढील काळात 16 नव्या मार्गिकांवर काम सुरू आहे. 2025 मध्ये सुरू झालेली भुयारी अॅक्वा लाइन कफ परेड ते छत्रपती शिवाजी महाराज टर्मिनस विमानतळापर्यंत जोडते, ज्यामुळे विमानतळ प्रवास अधिक सुलभ झाला आहे.
एप्रिल 2026 मध्ये मेट्रो लाइन 9 सुरू झाल्याने ठाणे शहर मेट्रो नेटवर्कशी जोडले गेले आहे.
नवे प्रकल्प आणि बुलेट ट्रेन
शहरातील वाहतूक सुधारण्यासाठी Sanjay Gandhi National Park खाली ठाणे-बोरिवली जुळ्या बोगद्याचे काम सुरू आहे. तसेच Navi Mumbai International Airport वर्षाअखेर सुरू होण्याची अपेक्षा असून 9 कोटी प्रवासी हाताळण्याची क्षमता असेल.
याशिवाय Mumbai–Ahmedabad High-Speed Rail प्रकल्पाद्वारे देशातील पहिली बुलेट ट्रेन सुरू होणार आहे.
कोणत्या मेट्रो मार्गिकांवर काम सुरू?
सध्या मेट्रो लाइन 2B, 4, 4A, 5, 6, 7A, 9 आणि 12 या मार्गिकांचे बांधकाम सुरू आहे. तर मेट्रो लाइन 8, 10, 11, 13 आणि 14 या मार्गांना मंजुरी मिळाली आहे.
या सर्व प्रकल्पांमुळे मुंबईतील वाहतूक कोंडी कमी होऊन शहर अधिक आधुनिक, जलद आणि जागतिक दर्जाचे बनण्याच्या दिशेने वाटचाल करत आहे.
