पती नागेश यांच्या निधनानंतर सोनाली मानसिक तणावात; दोन चिमुकल्या मुलींनी गमावले आई-वडिलांचे छत्र
मोशी : मोशी कचरा डेपो दुर्घटनेत पती नागेश गायकवाड यांचा मृत्यू झाल्यानंतर अवघ्या महिनाभरात त्यांच्या पत्नी सोनाली नागेश गायकवाड यांचाही मृत्यू झाल्याची हृदयद्रावक घटना बुधवारी रात्री समोर आली. रात्री सुमारे सात वाजण्याच्या सुमारास ही घटना घडली. पतीच्या निधनानंतर सोनाली मानसिक तणावात असल्याचे पोलिसांनी सांगितले असून, त्याच पार्श्वभूमीवर त्यांनी टोकाचे पाऊल उचलले असावे, असा प्राथमिक अंदाज व्यक्त करण्यात आला आहे. मात्र, या घटनेमागील नेमके कारण तपासानंतर स्पष्ट होणार आहे.
सोनाली यांच्या पश्चात चार वर्षांची श्रेया आणि दीड वर्षांची प्रिया या दोन मुली, आई-वडील आणि मोठा भाऊ स्वप्नील असा परिवार आहे. पतीच्या निधनाच्या धक्क्यातून कुटुंब सावरण्याचा प्रयत्न करत असतानाच सोनाली यांच्या मृत्यूने गायकवाड कुटुंबावर पुन्हा दुःखाचा डोंगर कोसळला आहे.
दोन चिमुकल्या मुली दुसऱ्या खोलीत
बुधवारी रात्री सोनाली घरात असताना त्यांच्या दोन्ही मुली दुसऱ्या खोलीत होत्या. मुली रडत असल्याचे लक्षात आल्यानंतर त्यांच्या दिराने परिस्थितीची चौकशी करण्याचा प्रयत्न केला. मात्र, आतून प्रतिसाद न मिळाल्याने त्यांनी दरवाजा तोडून पाहिले. त्यावेळी सोनाली यांचा मृत्यू झाल्याचे निदर्शनास आले.
घटनेची माहिती मिळताच पोलिसांना कळविण्यात आले. सोनाली यांचे दीर तसेच सासू-सासरे घरातील शेजारील खोलीत राहत असल्याची माहिती समोर आली आहे. कुटुंबीय घरात असतानाही ही दुर्दैवी घटना घडल्याने परिसरात हळहळ व्यक्त होत आहे.
महिनाभरात आई-वडिलांचे छत्र हरपले
गायकवाड दाम्पत्याला दोन लहान मुली आहेत. काही दिवसांपूर्वीच या मुलींनी वडील नागेश सर्जेराव गायकवाड यांना गमावले होते. आता आई सोनाली यांचाही मृत्यू झाल्याने अवघ्या महिनाभरात दोन्ही पालकांचे छत्र त्यांच्या डोक्यावरून हरपले आहे.
आई-वडिलांच्या निधनामुळे या दोन्ही चिमुकल्यांच्या भवितव्याचा प्रश्नही निर्माण झाला आहे. या घटनेने संजय गांधीनगर आणि मोशी परिसरातील नागरिकांमध्ये शोककळा पसरली आहे.
मुलींच्या भविष्यासाठी नागेश यांची धडपड
संजय गांधीनगर, मोशी येथील रहिवासी असलेले २९ वर्षीय नागेश सर्जेराव गायकवाड मागील तीन वर्षांपासून कंत्राटी कर्मचारी म्हणून कार्यरत होते. मोशी कचरा डेपो दुर्घटनेच्या वेळी प्रशासकीय इमारतीत असताना कचऱ्याचा ढिगारा कोसळल्याने त्यांचा मृत्यू झाला होता.
नागेश यांनी बारावीपर्यंत शिक्षण घेतल्यानंतर कुटुंबाच्या उदरनिर्वाहासाठी नोकरी स्वीकारली होती. स्वतःचे घर उभारणे आणि आपल्या दोन्ही मुलींना शिक्षण देणे, अशी त्यांची स्वप्ने होती. मात्र, दुर्घटनेत त्यांचा मृत्यू झाल्यानंतर कुटुंबावर आलेले संकट आता सोनाली यांच्या मृत्यूने आणखी गंभीर झाले आहे.
एमआयडीसी भोसरी पोलिसांकडून तपास
घटनेची माहिती मिळाल्यानंतर एमआयडीसी भोसरी पोलिसांनी घटनास्थळी जाऊन पाहणी केली. या प्रकरणी अकस्मात मृत्यूची नोंद करण्यात आली आहे. सोनाली यांच्या मृत्यूमागील नेमके कारण शोधण्यासाठी पोलिसांकडून तपास सुरू आहे.
पती नागेश यांच्या मृत्यूनंतर सोनाली दुःखी आणि मानसिक तणावाखाली असल्याचे पोलिसांच्या प्राथमिक माहितीतून समोर आले आहे. त्याच मानसिक अवस्थेतून त्यांनी टोकाचे पाऊल उचलले असावे, असा प्राथमिक अंदाज पोलिसांनी व्यक्त केला आहे. मात्र, अंतिम कारण तपास पूर्ण झाल्यानंतरच स्पष्ट होणार आहे.
मोशी कचरा डेपो दुर्घटनेत नऊ कामगारांचा मृत्यू
जुलै महिन्यात पुणे जिल्ह्यातील मोशी कचरा डेपो दुर्घटनेत नऊ कामगारांचा मृत्यू झाला होता. या दुर्घटनेत अनेक कुटुंबांनी आपला आधार गमावला. काही कुटुंबांतील मुलांनी वडिलांचे छत्र गमावले, तर काही कुटुंबांचा संसार आणि आर्थिक आधार एका क्षणात उद्ध्वस्त झाला.
कष्ट करून कुटुंबाचा उदरनिर्वाह करणाऱ्या या कामगारांच्या मृत्यूचा मोठा परिणाम त्यांच्या कुटुंबांवर झाला आहे. त्यानंतर आता नागेश गायकवाड यांच्या मृत्यूच्या महिनाभरात सोनाली यांच्या मृत्यूची घटना समोर आल्याने या कुटुंबावरील संकटाची तीव्रता आणखी अधोरेखित झाली आहे.
