मुक्तिसंग्रामाचा जाज्वल्य इतिहास नव्या पिढीसाठी प्रेरणादायी

स्व. माणिक पोदार लर्न स्कूल, वाढोणा येथे मराठवाडा मुक्ती संग्राम दिन उत्साहात

स्वातंत्र्यसैनिकांच्या संघर्ष व बलिदानाचे स्मरण, विद्यार्थ्यांना इतिहासातून देशप्रेमाचा संदेश

रिसोड (Marathwada Liberation Day) : मराठवाड्याच्या मुक्तीसाठी संघर्ष करणाऱ्या स्वातंत्र्यसैनिकांच्या त्यागाचे आणि बलिदानाचे स्मरण करीत स्व. माणिक पोदार लर्न स्कूल, वाढोणा येथे मराठवाडा मुक्ती संग्राम दिन मोठ्या उत्साहात साजरा करण्यात आला. मराठवाड्याच्या इतिहासातील या महत्त्वपूर्ण लढ्याचा वारसा नव्या पिढीपर्यंत पोहोचावा, विद्यार्थ्यांना स्वातंत्र्यसैनिकांच्या संघर्षाची जाणीव व्हावी आणि त्यांच्या त्यागातून देशप्रेमाची प्रेरणा मिळावी, या उद्देशाने कार्यक्रमाचे आयोजन करण्यात आले होते.

कार्यक्रमाला शाळेचे संचालक मंडळ, प्राचार्य, मुख्याध्यापिका, शिक्षक, चालक व दीदी यांची उपस्थिती होती. मराठवाड्याच्या मुक्तीसाठी संघर्ष करणाऱ्या स्वातंत्र्यसैनिकांच्या कार्याचे यावेळी कृतज्ञतापूर्वक स्मरण करण्यात आले. मुक्तिसंग्रामाच्या इतिहासातील संघर्ष, त्याग आणि स्वातंत्र्यप्राप्तीसाठी झालेल्या प्रयत्नांविषयी विद्यार्थ्यांना माहिती देण्यात आली.

कार्यक्रमाची प्रस्तावना शाळेच्या शिक्षिका पूर्वा मुंदडा यांनी केली. त्यांनी मराठवाडा मुक्ती संग्राम दिनाचे ऐतिहासिक महत्त्व सांगत या दिवसामागील संघर्षाची पार्श्वभूमी विद्यार्थ्यांसमोर मांडली. इतिहासातील अशा महत्त्वपूर्ण घटनांचे स्मरण नव्या पिढीला आपल्या स्वातंत्र्याचे मोल समजून घेण्यासाठी उपयुक्त ठरते, हा संदेश कार्यक्रमातून देण्यात आला.

शाळेचे शिक्षक अभयकुमार औंढेकर व कपिल टाक यांनी समयोचित भाषणातून मराठवाडा मुक्तिसंग्रामातील संघर्ष आणि स्वातंत्र्यसैनिकांच्या योगदानावर प्रकाश टाकला. स्वातंत्र्य सहजपणे मिळालेले नसून त्यामागे अनेकांचे त्याग, संघर्ष आणि समर्पण आहे, याची जाणीव विद्यार्थ्यांनी ठेवावी, असे विचार त्यांनी मांडले. इतिहासाकडे केवळ अभ्यासक्रमाचा भाग म्हणून न पाहता त्यातून प्रेरणा घेण्याचे महत्त्वही त्यांनी अधोरेखित केले.

प्राचार्य हर्षल वासेवाल यांनी मराठवाडा मुक्ती संग्रामाच्या ऐतिहासिक पार्श्वभूमीवर प्रकाश टाकला. स्वातंत्र्यसैनिकांनी केलेल्या संघर्षाचे स्मरण करताना विद्यार्थ्यांनी देशप्रेम, कर्तव्यभावना, शिस्त आणि सामाजिक जबाबदारीची मूल्ये आपल्या जीवनात जपावीत, असा संदेश त्यांनी दिला. कार्यक्रमाच्या माध्यमातून विद्यार्थ्यांना मराठवाडा मुक्ती संग्रामाच्या इतिहासाची ओळख होण्याबरोबरच स्वातंत्र्यसैनिकांच्या त्यागाचे महत्त्वही समजावून सांगण्यात आले. इतिहासातील संघर्ष आणि त्यातून मिळालेले स्वातंत्र्य यांची जाणीव नव्या पिढीमध्ये निर्माण करणारा हा कार्यक्रम ठरला. कार्यक्रमाचे आभार प्रदर्शन शिक्षक कपिल टाक यांनी केले.