आखाडा बाळापूर (Dongargaon tanker accident) : कळमनुरी तालुक्यातील डोंगरगाव पुल महामार्गावर भरधाव वेगातील टँकरने पाठीमागून धडक दिल्याने झालेल्या अपघातात महिला व एक बैल जागीच ठार झाला, तर एक बैल गंभीर जखमी झाला.
मंगळवारी सकाळी सव्वा नऊ वाजण्याच्या सुमारास हिंगोलीकडून नांदेडकडे जाणाऱ्या MH-26 F D 0939 या टँकरने डोंगरगाव पुल गावाजवळ महामार्गावरून शेतातून बैलांना चारून घराकडे परतणाऱ्या महिलेला पाठीमागून धडक दिली. यात संगीता किसन नरवाडे (वय 47 वर्षे) व एक बैल जागीच ठार झाला, तर एक बैल जखमी झाला, अशी माहिती बीट प्रमुख राजेश घोंगडे यांनी दिली.
अपघाताची (Dongargaon tanker accident) माहिती मिळताच पोलिस निरीक्षक शरद मरे, पोलिस उपनिरीक्षक सुनील रोहिणकर, गजानन राठोड, सागर वाढोणकर, अरविंद जाधव, विठ्ठल जाधव, परमेश्वर सरकटे व महामार्ग पोलिस पथकातील येळकीचे पोलिस उपनिरीक्षक साईनाथ अनमोड, सहायक पोलिस उपनिरीक्षक शेषराव पोले, सय्यद तयब अली, गजानन आगलावे यांनी घटनास्थळी भेट दिली. पोलिस व महामार्ग पोलिस पथकाने तातडीने घटनास्थळी धाव घेऊन अपघातग्रस्त वाहन रस्त्याच्या बाजूला केले व महामार्गावरील वाहतूक सुरळीत केली.
