परीक्षार्थ्यांच्या मागणीनंतर २४ एप्रिलपर्यंत अर्ज प्रक्रिया सुरू
पुणे (MAHATET 2026) : महाराष्ट्र राज्य परीक्षा परिषद, पुणे यांच्या वतीने घेण्यात येणाऱ्या महाराष्ट्र शिक्षक पात्रता परीक्षा (MAHATET) २०२६ संदर्भात महत्त्वाचा निर्णय घेण्यात आला आहे. परीक्षार्थ्यांच्या मागणीचा विचार करून ऑनलाईन अर्ज भरण्याच्या मुदतीत वाढ करण्यात आली आहे.
शासन निर्णय दिनांक २३ ऑगस्ट २०१३ नुसार MAHATET २०२६ परीक्षा रविवार, दि. २१ जून २०२६ रोजी आयोजित करण्यात येणार आहे. या परीक्षेसाठी ऑनलाईन अर्ज भरण्याची मूळ मुदत २७ मार्च २०२६ ते १६ एप्रिल २०२६ अशी होती.
मात्र अनेक उमेदवारांनी अर्ज भरण्यासाठी अतिरिक्त वेळ देण्याची विनंती केल्याने परीक्षा परिषदेकडून मुदतवाढ देण्याचा निर्णय घेण्यात आला आहे. त्यानुसार आता उमेदवारांना दि. १७ एप्रिल २०२६ ते २४ एप्रिल २०२६ या कालावधीत ऑनलाईन अर्ज करता येणार आहे.
महाराष्ट्र राज्य परीक्षा परिषदेचे आयुक्त महेश चोथे यांनी ही माहिती अधिकृतरीत्या प्रसिद्ध केली असून, इच्छुक उमेदवारांनी मुदतवाढीचा लाभ घेऊन वेळेत अर्ज पूर्ण करावा, असे आवाहन करण्यात आले आहे.
