रिसोड (State Scholarship Exam) : रिसोड तालुक्यातील मांगवाडी येथील विश्वा पब्लिक स्कूल गुणवत्तापूर्ण शिक्षण आणि विद्यार्थ्यांच्या सर्वांगीण विकासाच्या जोरावर शैक्षणिक क्षेत्रात सातत्याने यशाची नवी शिखरे गाठत आहे. शैक्षणिक सत्र २०२५-२६ मधील राज्यस्तरीय शिष्यवृत्ती परीक्षेत शाळेचा इयत्ता चौथीतील विद्यार्थी अवनीश प्रमोद गरकळ याने राज्यातून १४ वा क्रमांक पटकावून शाळेच्या शिरपेचात मानाचा तुरा रोवला आहे.
जिल्हाधिकारी कार्यालयात विशेष सत्कार
स्वातंत्र्यदिनाच्या ८०व्या वर्धापन दिनानिमित्त वाशिम जिल्हाधिकारी कार्यालयात आयोजित मुख्य शासकीय समारंभात जिल्ह्याचे पालकमंत्री ना. दत्तात्रय (दत्तामामा) भरणे यांच्या हस्ते अवनीशचा प्रमाणपत्र व गौरवचिन्ह देऊन जाहीर सत्कार करण्यात आला.
उपस्थिती: या गौरव सोहळ्यास अवनीशचे आई-वडील श्री. प्रमोद गरकळ व सौ. गरकळ यांच्यासह शाळेच्या प्रतिनिधी म्हणून विश्वा पब्लिक स्कूलच्या कोषाध्यक्ष सौ. मनीषा विश्वनाथजी सानप उपस्थित होत्या.
मार्गदर्शन आणि यशाचे गमक
विद्यार्थ्यांच्या या यशामागे शिक्षकांचे सातत्यपूर्ण नियोजन, कठोर परिश्रम आणि विश्वनाथजी सानप यांचे अमूल्य मार्गदर्शन लाभले. केवळ पुस्तकी ज्ञान न देता विद्यार्थ्यांमध्ये स्पर्धात्मक वृत्ती, आत्मविश्वास आणि कौशल्ये विकसित करण्यावर शाळेचा भर असल्यानेच हे यश शक्य झाल्याचे व्यवस्थापनाने नमूद केले. अवनीशच्या या उज्ज्वल यशामुळे विश्वा पब्लिक स्कूल, मांगवाडी परिसर आणि संपूर्ण रिसोड तालुक्यातून त्याचे व शाळेचे सर्व स्तरांतून कौतुक आणि अभिनंदन होत आहे.
