शंभर वर्षांचा रस्ता रोखल्याचा आरोप; राष्ट्रीय स्वयंसेवक संघाच्या शहर प्रमुखांचा जागेवर मालकीचा दावा
चिखली : स्थानिक आयटीआय (ITI) आणि जिल्हा परिषद शाळेच्या मुख्य प्रवेशद्वारावर गेल्या चार दिवसांपासून एक चारचाकी गाडी आडवी लावून रस्ता बंद करण्यात आल्याने शिक्षक, विद्यार्थी आणि नागरिकांना नाहक त्रासाला सामोरे जावे लागत आहे. याप्रकरणी महाराष्ट्र नवनिर्माण सेनेने (मनसे) आक्रमक भूमिका घेत रस्ता त्वरित मोकळा करण्याची मागणी पोलीस व आयटीआय प्रशासनाकडे केली. वाढत्या वादानंतर पोलिसांनी अखेर ती गाडी ताब्यात घेऊन पोलीस ठाण्यात हलवली असून, आता हा वाद थेट पोलीस ठाण्यात पोहोचला आहे.
गेल्या चार दिवसांपासून गेटवरच गाडी उभी असल्याने आयटीआयचे विद्यार्थी, विद्यार्थिनी आणि जिल्हा परिषद शाळेचे शिक्षक तासन् तास रस्त्यावर ताटकळत उभे होते. यामुळे विद्यार्थ्यांना वेळेवर वर्गात पोहोचता आले नाही. या गंभीर प्रकारावर मनसेचे जिल्हाप्रमुख गणेश उर्फ बंडू बरबडे, राजेश परिहार, खरपास आदी पदाधिकाऱ्यांनी तीव्र संताप व्यक्त केला.
“शासनाने या ठिकाणी लाखो-करोडो रुपये खर्चून आयटीआयची इमारत उभारली आहे, तर जिल्हा परिषदेची शाळा येथे गेल्या शंभर वर्षांपासून सुरू आहे. विद्यार्थी आणि स्थानिक नागरिक अनेक वर्षांपासून याच रस्त्याचा वापर करत आहेत. मग अचानक रस्त्याचा आणि जागेचा वाद आताच कसा समोर आला? प्रशासनाने तात्काळ दखल घेऊन विद्यार्थ्यांसाठी हा रस्ता कायमचा मोकळा करून द्यावा,” अशी ठाम भूमिका मनसे जिल्हाप्रमुख गणेश बरबडे यांनी मांडली.
दरम्यान, या संपूर्ण प्रकरणात राष्ट्रीय स्वयंसेवक संघाचे (RSS) शहर प्रमुख शरद भाला यांनी संबंधित जागेवर स्वतःचा मालकी हक्क सांगत दावा केला आहे. “ज्या ठिकाणी गाडी उभी होती, ती माझी मालकीची जागा (प्लॉट) आहे. माझी ही बाजू मी पोलीस प्रशासनासमोर अधिकृतपणे मांडणार आहे,” असे भाला यांनी स्पष्ट केले.
आयटीआय प्राचार्यांच्या भूमिकेवर प्रश्नचिन्ह
गेल्या चार दिवसांपासून प्रवेशद्वारावर गाडी लावून रस्ता अडवला गेला असताना आयटीआयच्या प्राचार्यांनी यासंदर्भात पोलीस प्रशासनाला तात्काळ लेखी तक्रार का दिली नाही? असा संतप्त सवाल यावेळी उपस्थित केला जात आहे. प्राचार्यांच्या या दुर्लक्षामुळे विद्यार्थ्यांचे शैक्षणिक नुकसान झाले असल्याचा आरोप पालकांकडून केला जात आहे.
मनसे पदाधिकारी आणि आयटीआयच्या प्राचार्यांनी पोलीस ठाण्यात धाव घेत गाडी हटवण्याची मागणी केल्यानंतर पोलिसांनी कारवाई करत गाडी पोलीस ठाण्यात जमा केली आहे. हा संपूर्ण विषय कायदेशीर बाबींशी जोडला गेला असला, तरी अनेक वर्षांपासून वापरात असलेला रस्ता अचानक बंद झाल्याने नागरिक आणि विद्यार्थ्यांमध्ये तीव्र असंतोष पसरला आहे. आता या वादावर पोलीस प्रशासन व महसूल प्रशासन काय भूमिका घेते, याकडे संपूर्ण शहरवासीयांचे आणि विद्यार्थ्यांचे लक्ष लागले आहे.
