अफवांवर विश्वास ठेवू नका; आवश्यकतेपुरतेच इंधन घ्या: तहसीलदार सौरभ गावंडे यांचे आवाहन
चिखली (Petrol-Diesel Shortage) : चिखली तालुक्यात पेट्रोल व डिझेल टंचाईबाबत विविध अफवा पसरत असल्याने नागरिकांमध्ये भीतीचे वातावरण निर्माण झाले असून अनेक पेट्रोल पंपांवर वाहनांच्या लांबलचक रांगा लागत आहेत. या पार्श्वभूमीवर प्रशासन सक्रिय झाले असून तहसीलदार सौरभ गावंडे यांनी नागरिकांना कोणत्याही अप्रमाणित माहितीवर विश्वास न ठेवण्याचे आवाहन केले आहे.
तहसीलदार गावंडे यांनी प्रसिद्धीस दिलेल्या पत्रकात म्हटले आहे की, तालुक्यात पेट्रोल व डिझेल (Petrol-Diesel Shortage) पुरवठ्याबाबत प्रशासन संबंधित यंत्रणेशी सातत्याने समन्वय साधत आहे. त्यामुळे नागरिकांनी घाबरून जादा प्रमाणात इंधन खरेदी करू नये तसेच केवळ आवश्यकतेपुरतेच इंधन भरून घ्यावे. अनावश्यक गर्दीमुळे वाहतूक कोंडी, सार्वजनिक गैरसोय आणि कायदा व सुव्यवस्थेचा प्रश्न निर्माण होण्याची शक्यता असल्याचेही त्यांनी स्पष्ट केले.
पेट्रोल व डिझेल (Petrol-Diesel Shortage) हे अत्यंत ज्वलनशील पदार्थ असल्याने त्यांची साठवण, वाहतूक व हाताळणी ही कायद्याने नियंत्रित असल्याचे प्रशासनाने स्पष्ट केले आहे. Petroleum Act 1934 व Petroleum Rules 2002 अंतर्गत नियमभंग करणाऱ्यांवर दंडात्मक कारवाईची तरतूद असून संबंधित इंधन व भांडी जप्त करण्याचे अधिकार अधिकाऱ्यांना आहेत. नागरिकांनी पेट्रोल पंपांवर बॉटल, प्लास्टिक कॅन किंवा इतर अनधिकृत व असुरक्षित भांड्यांमध्ये पेट्रोल अथवा डिझेल भरण्याची मागणी करू नये, असे आवाहनही करण्यात आले आहे. नियमबाह्य कंटेनरमध्ये इंधन भरणे धोकादायक असून ते कायद्याचे उल्लंघन ठरू शकते, असे प्रशासनाने स्पष्ट केले.
तसेच पेट्रोल पंप चालक व कर्मचाऱ्यांनी कोणत्याही परिस्थितीत नियमबाह्य पद्धतीने इंधन वितरण करू नये, असे निर्देश देण्यात आले आहेत. अफवा पसरविणे, कृत्रिम टंचाईची भीती निर्माण करणे, बेकायदेशीर साठेबाजी करणे किंवा सार्वजनिक शिस्त भंग करणाऱ्यांवर कठोर कारवाई करण्यात येणार असल्याचा इशाराही तहसीलदार सौरभ गावंडे यांनी दिला आहे.
अफवा पसरविणाऱ्या व्यक्ती, साठेबाजी किंवा नियमभंगाच्या घटना आढळल्यास तहसील कार्यालय, स्थानिक पोलीस स्टेशन किंवा पुरवठा विभागाशी तात्काळ संपर्क साधण्याचे आवाहन प्रशासनाने केले आहे.
