हिंगोली : औंढा नागनाथ तालुक्यातील जवळा बाजार शिवारातून विनारॉयल्टी मुरुमाचे उत्खनन करून अवैधरित्या चोरून नेत असताना हट्टा पोलिसांनी राहुल पाटील महाविद्यालयासमोर एका टिप्परला ताब्यात घेऊन गुन्हा दाखल केला.
अनेक ठिकाणी अवैधरित्या रेती व मुरुमाचे उत्खनन होत असल्याने जिल्हाधिकारी राहुल गुप्ता यांनी कारवाई करण्याच्या सूचना महसूल यंत्रणेला दिल्या आहेत. त्यानुसार या यंत्रणेमार्फत अनेक ठिकाणी कारवाईदेखील केली जात आहे. तसेच जिल्हा पोलीस अधीक्षक श्रेणीक लोढा यांनीही जिल्ह्यातील सर्व १३ पोलीस ठाण्यांच्या अधिकाऱ्यांना अवैध रेती व मुरुमाचे उत्खनन करणाऱ्यांवर कारवाई करण्याच्या सूचना दिल्या आहेत.
११ जुलै रोजी जवळा बाजार शिवारातून टिप्पर क्रमांक एम.एच. ३८ एक्स ८४७० मधून ६ हजार रुपये किमतीचा दोन ब्रास मुरूम विनारॉयल्टी उत्खनन करून अवैधरित्या चोरून नेला जात होता. हट्टा येथील राहुल पाटील महाविद्यालयासमोर पोलिसांनी हा टिप्पर पकडला.
या कारवाईत टिप्परसह मुरूम असा एकूण १० लाख ६ हजार रुपयांचा मुद्देमाल जप्त करण्यात आला. हट्टा पोलीस ठाण्यात किशोर कवठेकर यांच्या फिर्यादीवरून भीमानंद सदाशिव काळे, रा. जवळा बाजार, यांच्याविरुद्ध गुन्हा दाखल करण्यात आला आहे.
