सेनगाव तालुक्यातील पुसेगाव येथील घटना
जिल्हा न्यायाधिश श्रीमती एस.एन माने - गाडेकर यांनी सुनावला निकाल
हिंगोली (Pusegaon Double murder Case) : लग्न का करून देत नाही या कारणावरून आजी आणि मावशीचा कुर्‍हाडीने व काठीने निर्घृण खून करणार्‍या आरोपीला हिंगोली येथील जिल्हा न्यायाधीश-१ श्रीमती एस.एन. माने-गाडेकर यांनी दुहेरी हत्येप्रकरणी दुहेरी जन्मठेपेची शिक्षा सुनावली आहे. पुसेगाव शिवारातील शेत गट क्रमांक ४३५ मधील ही घटना असून या ऐतिहासिक निकालामुळे न्यायालयीन वर्तुळात खळबळ उडाली आहे.
या (Pusegaon Double murder Case) संदर्भात जिल्हा सरकारी वकील एन. एस. मुटकुळे यांनी दिलेली माहिती अशी की, सेनगाव तालुक्यातील पुसेगाव येथील दशरथ किसन पहारे यांनी पोलीस ठाणे नर्सी नामदेव येथे २० मार्च २०२१ रोजी तक्रार दिली होती. त्यानुसार सकाळी ९:३० वाजताच्या सुमारास दशरथ पहारे यांचा भाचा आरोपी रोहीदास नंदुलाल चर्‍हाटे, रा. पुसेगाव ता. सेनगाव याने 'तुम्ही माझे लग्न का करून देत नाही' या कारणावरून वाद घातला. या वादातून त्याने दशरथची आई तथा रोहीदासची आजी देवकाबाई किसन पहारे, (८५) व परभणी येथून आई व बहिणीच्या भेटीसाठी माहेरी आलेली दशरथची बहीण तथा रोहीदासची मावशी मंगलाबाई उत्तम बशिरे, (४५) यांना कुर्‍हाडीने व काठीने डोक्यात, पाठीवर गंभीर मारहाण करून जागीच ठार मारले. तसेच अनुसयाबाई नंदुलाल चर्‍हाटे (६५) यांना देखील मारहाण करून जखमी केले होते.
या (Pusegaon Double murder Case) प्रकरणी पोलीस ठाणे नर्सी नामदेव येथे खुनाचा गुन्हा नोंद करण्यात आला होता. सदर प्रकरणाचा सखोल तपास तत्कालिन सहाय्यक पोलीस निरीक्षक एस.एम.गिरी यांनी करून दोषारोपपत्र जिल्हा न्यायालय हिंगोली येथे दाखल केले होते. या खटल्याची सुनावणी १ सप्टेंबर २०२६ रोजी जिल्हा न्यायाधीश-१ हिंगोली श्रीमती एस.एन.माने-गाडेकर यांच्यासमोर झाली. दोन्ही बाजूंचा युक्तिवाद ऐकून न्यायालयाने आरोपी रोहीदास नंदुलाल चर्‍हाटे यास दोषी ठरवले.
न्यायालयाने रोहीदास चर्‍हाटे याची दशरथची आई देवकाबाई किसन पहारे यांच्या खून प्रकरणी भा.दं.वि.कलम ३०२ अंतर्गत जन्मठेपेची शिक्षा आणि १० हजार रुपये दंड, दंड न भरल्यास १ वर्ष सक्तमजुरी तसेच मंगलाबाई उत्तम बशिरे यांच्या खून प्रकरणी देखील जन्मठेपेची शिक्षा आणि १० हजार रुपये दंड, दंड न भरल्यास १ वर्ष सक्तमजुरी अशी शिक्षा सुनावली. तसेच अनुसयाबाई चर्‍हाटे यांना मारहाण करून जखमी केल्याप्रकरणी भा.दं.वि. कलम ३२४ अंतर्गत १ वर्ष सक्तमजुरी व ५ हजार रुपये दंड, दंड न भरल्यास २ महिने सक्तमजुरी आणि कलम ५०६ अंतर्गत ३ वर्ष सक्तमजुरी व १५ हजार रुपये दंड, दंड न भरल्यास ६ महिने सक्तमजुरी अशी शिक्षा सुनावली असून सर्व शिक्षा एकत्रितरित्या भोगण्याचा आदेश न्यायालयाने दिला आहे.
मयत देवकाबाई किसन पहारे यांचे कायदेशीर वारस दशरथ किसन पहारे, मंगलाबाई उत्तम बशिरे यांचे कायदेशीर वारस तसेच जखमी अनुसयाबाई नंदलाल चर्‍हाटे यांना नियमानुसार योग्यती नुकसान भरपाई देण्याचे निर्देश जिल्हा विधीसेवा प्राधीकरण परभणी यांना दिले आहेत. या प्रकरणात सरकार पक्षातर्फे जिल्हा सरकारी वकील एन.एस. मुटकुळे यांनी बाजू मांडले. व न्यायालय समक्ष एकुण १३ साक्षिदार तपासले. तसेच अंतिम युक्तीवाद सादर केला. त्यांना सहाय्यक सरकारी वकील एस.डी. कुटे व श्रीमती सविता एस. देशमुख - जाधव यांनी सहकार्य केले. (Pusegaon Double murder Case) सदर प्रकरणी कोर्ट पैरणी महिला सहाय्यक पोलिस उपनिरीक्षक श्रीमती ज्योती खिल्लारे पोलिस ठाणे नर्सी नामदेव यांनी सहकार्य केले.
