माणुसकीचा आदर्श..घोट येथील मनोरुग्ण सुनील रंगारी यांचा नवीन वस्त्र व पादत्राण देऊन सत्कार

घोट (National Human Rights Organization) : घोट येथील सुनील केशव रंगारी या मनोरुग्ण व्यक्तीचा राष्ट्रीय मानवाधिकार संघटनेच्या वतीने नवीन वस्त्र व पादत्राण भेट देऊन सन्मान करण्यात आला. तसेच त्यांच्यासाठी हॉटेल उपाध्ये येथे जेवणाची कायमस्वरूपी व्यवस्था करून माणुसकीचा आदर्श घालून देण्यात आला. सुनील रंगारी हे घोट परिसरात निःस्वार्थपणे रस्ते,परिसर,घोटगावाची साफसफाई करत असतात. कोणाकडून मोबदल्याची अपेक्षा न ठेवता ते सेवा देत असून, कुणी अन्न दिले तरी आनंदाने स्वीकारतात आणि नाही दिले तरी कोणतीही तक्रार करत नाहीत. खाकी पोशाख परिधान करून अनेकांना "जय हिंद" म्हणत सॅल्यूट करणारे सुनील रंगारी संपूर्ण पंचक्रोशीत परिचित आहेत.

त्यांच्या या सेवाभावी वृत्तीची माहिती राष्ट्रीय मानवाधिकार संघटनेचे प्रदेशाध्यक्ष डॉ. प्रणय खुणे यांना मिळाल्यानंतर त्यांनी सुनील रंगारी यांची भेट घेऊन त्यांना नवीन कपडे, पादत्राणे भेट दिली. तसेच त्यांच्या जेवणाची व्यवस्था करून समाजासमोर संवेदनशीलतेचा आदर्श निर्माण केला.

यावेळी डॉ. प्रणय खुणे म्हणाले की,समाजात अनेकजण निःस्वार्थपणे कार्य करत असतात; मात्र त्यांच्याकडे अनेकदा दुर्लक्ष होते.अशा गरजू व्यक्तींना पैशांपेक्षा अन्न, पाणी आणि मायेची गरज असते. प्रत्येकाने आपल्या परीने अशा व्यक्तींना मदतीचा हात दिल्यास त्यांच्या जीवनात सकारात्मक बदल घडू शकतो.या कार्यक्रमाला राष्ट्रीय मानवाधिकार संघटनेचे जिल्हा उपाध्यक्ष नानुभाऊ उपाध्ये, भाजप घोट मंडळ अध्यक्ष राकेश सरकार, आदिवासी आघाडी अध्यक्ष विलास उईके,भोजराज रामटेके,राष्ट्रीय मानवाधिकार संघटनेचे नेते महेश विश्वास,तालुका सचिव दिनेश मुजुमदार तसेच संघटनेचे पदाधिकारी व कार्यकर्ते उपस्थित होते.