अपहार केलेल्या रकमेपैकी 29 लाख 99 हजार 755 रुपये आरोपीने कार्यालया कडे धनादेशाद्वारे केले जमा
हिंगोली (Hingoli Zilla Parishad) : जिल्हा परिषदेच्या पशुसंवर्धन विभागात सुमारे 53 लाख 95 हजार रुपयांचा मोठा आर्थिक अपहार उघडकीस आला आहे. या प्रकरणी हिंगोली शहर पोलीस ठाण्यात 28 एप्रिल 2026 रोजी रात्री गुन्हा दाखल करण्यात आला. (Hingoli Zilla Parishad) जिल्हा परिषदेचे उपयुक्त पशुसंवर्धन व दुग्धव्यवसाय डॉ. सखाराम बाबुराव खुणे यांनी दिलेल्या फिर्यादीवरून ही कारवाई करण्यात आली.
फिर्यादीनुसार पशुसंवर्धन विभागात कनिष्ठ साहाय्यक (लेखा) या पदावर कार्यरत असलेल्या व सध्या निलंबित असलेल्या श्रीमती सोनल चंद्रकांत जावळे यांनी 1 ऑक्टोबर 2015 ते 11 जून 2025 या कालावधीत हा अपहार केला. आरोपीने मुख्य कार्यकारी अधिकारी आणि जिल्हा पशुसंवर्धन अधिकारी यांच्या बनावट स्वाक्षऱ्या करून वेगवेगळे धनादेश तयार केले. सेवाशुल्काच्या 39 लाख 80 हजार 943 रुपये, वेतन व भत्ते कपातीचे 12 लाख 3 हजार 709 रुपये तसेच पुरवठादारांच्या जीएसटी व टीडीएसचे 2 लाख 11 हजार 46 रुपये असे एकूण 53 लाख 95 हजार 698 रुपये स्टेट बँक ऑफ इंडिया, हिंगोली शाखेतील खाते क्रमांक 0062069635805 मध्ये वर्ग करून त्यांचा अपहार केला.
दरम्यान अपहार केलेल्या रकमेपैकी 29 लाख 99 हजार 755 रुपये आरोपीने कार्यालयाकडे धनादेशाद्वारे जमा केले आहेत. हिंगोली शहर पोलीस ठाण्यात विविध कलमान्वये गुन्हा नोंदवण्यात आला आहे. या (Hingoli Zilla Parishad) प्रकरणाचा तपास पोलीस उपनिरीक्षक वाघमारे करीत असून आरोपीला अद्याप अटक करण्यात आलेली नाही. दहा वर्षांच्या कालावधीत झालेल्या या अपहारामुळे जिल्हा परिषद वर्तुळात खळबळ उडाली असून पुढील तपास सुरू आहे.
