हिंगोली (112 Helpline Number) : स्थानिक ११२ आपत्कालीन क्रमांकावर आलेल्या एका कॉलची तात्काळ दखल घेत पोलीस प्रशासनाने दाखवलेल्या तत्परतेमुळे एक मोठा वाद टळल्याची सकारात्मक घटना समोर आली आहे.
मिळालेल्या माहितीनुसार, शेतीच्या कारणावरून उद्भवलेल्या एका वादाप्रकरणी संबंधित नागरिकाने तात्काळ '११२' या आपत्कालीन क्रमांकावर (112 Helpline Number) संपर्क साधून पोलिसांची मदत मागितली होती. कॉलची गांभीर्याने दखल घेत, हिंगोली ग्रामीण पोलिस ठाण्याचे पोलीस निरीक्षक विष्णुकांत गुट्टे यांच्या मार्गदर्शनात पोलीस अंमलदार शरद दत्तराव नागुलकर व बीट जमादार बापू चव्हाण यांनी कसलाही विलंब न लावता थेट घटनास्थळावर धाव घेतली.
घटनास्थळी पोहोचल्यानंतर पोलीस अंमलदार नागुलकर यांनी दोन्ही बाजू समजून घेतल्या आणि अत्यंत समजूतदारपणे मध्यस्थी केली. त्यांनी कॉलर आणि उपस्थित इतर लोकांचे कायदेशीर व सामोपचाराने समाधान केले. पोलिसांच्या या योग्य आणि वेळेवर केलेल्या मार्गदर्शनामुळे शेतीच्या कारणावरून होणारा संभाव्य मोठा वाद आणि कायदा-सुव्यवस्थेचा प्रश्न जागीच निकाली निघाला. पोलिसाच्या सतर्कतेमुळे मोठा होणारा वाद यामुळे कळला यामुळे पोलिसांचे माळहिवरा ग्रामस्थांनी अभिनंदन केले आहे.
