धानोरा काळे येथील गोदावरी पुलावरील घटना; एनडीआरएफ पथकाकडून शोधमोहीम सुरू
पालम : धानोरा काळे येथे गणेश विसर्जनासाठी गेलेले दोन युवक गणेश विसर्जन केल्यानंतर गोदावरी नदीपात्रात पोहण्यासाठी गेले. यावेळी पाण्याचा अंदाज न आल्याने दोघेही पाण्यात बुडाले. ही घटना शुक्रवार, २५ सप्टेंबर रोजी धानोरा काळे येथील पुलावर सायंकाळी घडली. गजानन रामदासराव घोरपडे आणि मुंजाजी आश्रुबा घोरपड, रा. पालम, अशी बुडालेल्या युवकांची नावे आहेत.
पोलीसांच्या माहितीनुसार, गणेश विसर्जन केल्यानंतर दोन्ही युवकांनी पोहण्यासाठी नदीपात्रातील पाण्यात उड्या मारल्या. यावेळी ते पाण्यात बुडाले. घटनेची माहिती मिळताच बचावकार्य सुरू करण्यात आले.
दोन्ही युवकांचा शोध घेण्यासाठी एनडीआरएफ पथकाला पाचारण करण्यात आले असून नदीपात्रात युद्धपातळीवर शोधमोहीम सुरू आहे. पालम पोलीस ठाण्याचे पोनि. आदित्य लोणीकर, पोउपनि. प्रकाश लोखंडे आणि पोउपनि. तुळशीराम चिटेवार हे पोलीस पथकासह घटनास्थळी उपस्थित आहेत.
नदीतील पाण्याची खोली, प्रवाह आणि अडथळे लक्षात घेऊन एनडीआरएफ पथकाकडून विविध ठिकाणी शोध घेतला जात आहे.
