अन्यथा आंदोलन करण्याचा इशारा..
घोट (Ghot-Regdi Road) : राष्ट्रीय मानवाधिकार संघटनेचे प्रदेशाध्यक्ष प्रणय खुणे यांनी घोट–रेगडी मार्गाची प्रत्यक्ष पाहणी करून रस्त्याच्या दुरवस्थेबाबत तीव्र नाराजी व्यक्त केली. चामोर्शी, मुलचेरा व एटापल्ली तालुक्यांना जिल्हा मुख्यालयाशी जोडणाऱ्या या महत्त्वाच्या मार्गाकडे प्रशासन सातत्याने दुर्लक्ष करीत असल्याचा आरोप त्यांनी केला.पावसाळ्यामुळे मार्गावर मोठमोठे खड्डे पडून रस्ता अत्यंत धोकादायक बनला आहे. यामुळे नागरिक, विद्यार्थी, शेतकरी, रुग्णवाहिका तसेच इतर वाहनचालकांना मोठ्या अडचणींचा सामना करावा लागत आहे.
त्यामुळे संबंधित विभागाने तात्काळ रस्त्याची दुरुस्ती करून नागरिकांना सुरक्षित वाहतुकीची सुविधा उपलब्ध करून द्यावी, अशी मागणी राष्ट्रीय मानवाधिकार संघटनेचे राष्ट्रीय प्रदेशाध्यक्ष प्रणय खुणे यांनी केली.याप्रसंगी त्यांनी प्रशासनाला इशारा देत सांगितले की, या गंभीर समस्येकडे त्वरित लक्ष न दिल्यास राष्ट्रीय मानवाधिकार संघटनेच्या वतीने नागरिकांना सोबत घेऊन तीव्र लोकआंदोलन छेडण्यात येईल. घोट परिसरातील नागरिकांनीही या मागणीला पाठिंबा देत घोट–रेगडी मार्गाची कायमस्वरूपी दुरुस्ती करण्याची मागणी केली आहे.
याप्रसंगी संघटनेचे जिल्हाध्यक्ष रमेश अधिकारी, चामोशी तालुका अध्यक्ष राकेश सरकार,विलास उईके, विलास वडेटीवार,विशाल दहिवले,पलास घरामी,दिनेश मुजुमदार आदी उपस्थित होते
