संगमनेरमध्ये FDA ची धडक कारवाई; ‘Made in Pakistan’ सौंदर्यप्रसाधनांचा साठा जप्त, दुकानदार ताब्यात

अहिल्यानगरच्या गोल्डन मार्केटमध्ये पोलीस बंदोबस्तात छापा; भारतात विक्रीस परवानगी नसलेल्या ‘गोरी’ क्रीमसह १४ हजार रुपयांचा मुद्देमाल जप्त

अहिल्यानगर जिल्ह्यातील संगमनेर शहरातील गोल्डन मार्केट परिसरात अन्न व औषध प्रशासनाने (FDA) पोलिसांच्या मदतीने केलेल्या अचानक कारवाईत पाकिस्तानात तयार झालेल्या सौंदर्यप्रसाधनांचा साठा उघडकीस आला आहे. या कारवाईदरम्यान ‘Made in Pakistan’ असा उल्लेख असलेली उत्पादने जप्त करण्यात आली असून याप्रकरणी दुकानदार शाहीद रियाज शेख (वय ३६) याला चौकशीसाठी ताब्यात घेण्यात आले आहे.

FDA च्या पथकाने केलेल्या तपासणीत बाजारात विक्रीसाठी ठेवलेल्या अनेक सौंदर्यप्रसाधनांवर “Made in Pakistan” असा स्पष्ट उल्लेख आढळला. जप्त केलेल्या उत्पादनांमध्ये मानवी आरोग्यासाठी धोकादायक मानली जाणारी ‘गोरी ब्युटी क्रीम’ (Gori Beauty Cream) आणि ‘गोरी डे अँड नाईट क्रीम’ (Gori Day and Night Cream) यांचा समावेश आहे.

या कारवाईत सुमारे १४ हजार रुपयांचा सौंदर्यप्रसाधनांचा साठा जप्त करण्यात आला. संबंधित उत्पादनांना भारतात विक्रीसाठी कोणतीही वैध परवानगी नसल्याचे प्राथमिक तपासात समोर आले आहे. त्यामुळे हा साठा अहिल्यानगरपर्यंत कसा पोहोचला, याचा तपास अन्न व औषध प्रशासन आणि पोलीस संयुक्तपणे करत आहेत.

या प्रकरणी दुकानदाराविरोधात संगमनेर शहर पोलिस ठाण्यात विविध कलमांनुसार गुन्हा दाखल करण्यात आला असून पुढील चौकशी सुरू आहे. या कारवाईमुळे संगमनेरसह संपूर्ण जिल्ह्यात खळबळ उडाली असून बेकायदेशीररीत्या विक्री होणाऱ्या सौंदर्यप्रसाधनांच्या साखळीचा शोध घेण्यावर तपास यंत्रणांचा भर आहे.