डी. वाय. पाटील ग्रुपचे संस्थापक, बिहार, त्रिपुरा आणि पश्चिम बंगालचे माजी राज्यपाल यांचे वयाच्या ९१ व्या वर्षी कोल्हापुरात निधन
मुंबई : शिक्षण, समाजसेवा आणि सार्वजनिक जीवनातील महत्त्वाचे व्यक्तिमत्त्व म्हणून ओळख असलेले पद्मश्री डी. वाय. पाटील यांचे वयाच्या ९१ व्या वर्षी निधन झाले. त्यांनी कोल्हापूर येथे अखेरचा श्वास घेतला. त्यांच्या निधनाच्या वृत्ताने राजकीय तसेच शैक्षणिक क्षेत्रात शोककळा पसरली आहे.
डी. वाय. पाटील यांचे पूर्ण नाव ज्ञानदेव यशवंतराव पाटील असे होते. ते प्रख्यात शिक्षणतज्ज्ञ, समाजसेवक तसेच बिहार, त्रिपुरा आणि पश्चिम बंगाल या राज्यांचे माजी राज्यपाल म्हणून कार्यरत होते. याशिवाय ते डी. वाय. पाटील ग्रुपचे संस्थापक होते.
महाराष्ट्रात शिक्षण आणि आरोग्य क्षेत्राच्या विकासासाठी त्यांनी उल्लेखनीय योगदान दिले. शैक्षणिक संस्था उभारून उच्च शिक्षणाच्या प्रसारात त्यांनी महत्त्वाची भूमिका बजावली. शिक्षण क्षेत्रातील त्यांच्या कार्याची व्यापक दखल घेतली जात होती.
त्यांच्या निधनामुळे शिक्षणविश्वासह सामाजिक आणि राजकीय क्षेत्रातून हळहळ व्यक्त केली जात असून, त्यांच्या कार्याची आठवण अनेकांनी श्रद्धेने केली आहे.
