देवशयनी एकादशीनिमित्त नर्सीत भाविकांची मांदियाळी 

हजारो भाविकांनी  घेतले दर्शन, दर्शन रांगेतील भाविकांना साबुदाणा खिचडी वाटप

हिंगोली (Ashadhi Ekadashi) : तालुक्यातील नर्सी नामदेव येथे देवशयनी आषाढी एकादशीनिमित्त २५ जुलै शनिवार रोजी नर्सी नामदेव येथील श्री संत शिरोमणी नामदेव महाराजांच्या मंदिरात पहाटेपासूनच भाविकांची प्रचंड गर्दी झाली होती. महाराष्ट्रासह पंजाब आणि आंध्रप्रदेशातून आलेल्या हजारो वारकऱ्यांनी नामदेव महाराजांचे दर्शन घेऊन मंदिर परिसर जय नामदेव च्या जयघोषाने दुमदुमला.

त्यानंतर सकाळी सात वाजता शिवाजी मुटकुळेव मंडळ अधिकारी सुभाष बोडखे यांच्या हस्ते महापूजा करण्यात आली. यावेळी संस्थानचे उपाध्यक्ष भिकाजी किर्तनकार, विश्वस्त मनोज आखरे, द्वारकादास सारडा, राहुल नाईक, आंबादास गाडे, रमेश मगर, उपसरपंच ज्ञानेश्वर किर्तनकार यांच्यासह भाविकांची उपस्थिती होती. त्यानंतर आमदार तान्हाजी मुटकुळे यांनी संत नामदेव महाराजांच्या समाधीचे दर्शन घेतले. यावेळी के. के. शिंदे, नारायण खेडेकर, माणिकराव लोडे यांच्यासह नागरीक उपस्थित होते.

एकादशीच्या निमित्ताने मंदिराला आकर्षक फुलांची आणि विद्युत रोषणाईने सजावट करण्यात आली होती. पहाटे ४ वाजल्यापासूनच भाविकांनी दर्शनासाठी रांगा लावल्या. अनेक भाविकांनी उपवास करून नामदेव महाराजांच्या पादुकांचे दर्शन घेतले. मंदिरात दिवसभर हरिपाठ, कीर्तन आणि भजनाचा कार्यक्रम सुरू होता.

भाविकांची गैरसोय होऊ नये यासाठी मंदिर प्रशासन आणि स्थानिक सामाजिक संस्थांच्या वतीने विशेष व्यवस्था करण्यात आली होती. तसेच भाविकांच्या सोयीसाठी वाटरप्रुफ मंडप उभारण्यात आला होता. माणिक लोडे यांच्या वतीने मंदिर परिसरात हजारो भाविकांना  १५ हजार क्विंटल साबुदाणा खिचडीचे वाटप करण्यात आले. 

तसेच आरोग्य तपासणी शिबिराचे आयोजन करण्यात आले होते. यामध्ये डॉक्टरांच्या पथकाने भाविकांची मोफत तपासणी करून औषधोपचार दिले. भाविकांच्या चपलांच्या सुरक्षिततेसाठी मोफत चप्पल स्टॅन्डही उभारण्यात आला होता. नामदेव महाराजांची जन्मभूमी असल्याने नर्सी नामदेवला देवशयनी एकादशीला विशेष महत्त्व आहे. दिंडी, टाळ-मृदंगाच्या गजरात आणि विठ्ठलनामाच्या गजरात संपूर्ण गाव भक्तिमय झाले होते.

मंदिर समिती, पोलीस प्रशासन आणि स्वयंसेवकांनी गर्दीचे नियोजन करून शांततेत दर्शनाची व्यवस्था केली. दर्शनासाठी आलेल्या भाविकांनी नामदेव महाराज की जय" च्या जय घोषाणे मंदिर परिसर दणाणून गेला होता. भाविकांच्या गर्दीने मंदिर परिसराला यात्रेचे स्वरूप आले होते. येथे विविध साहित्य विक्रीचे स्टॉल, प्रसादालय, धार्मिक साहित्य विक्रीचे स्टॉल उभारण्यात आले होते.