वसमत (Archaeological Discovery) : वसमत येथील मोठ्या तलावाच्या खोलीकरणाच्या कामादरम्यान पुरातन शिवलिंग आणि गणेशाची मूर्ती आढळून आली आहे. या शोधामुळे परिसरातील ऐतिहासिक वारशाबाबत नव्याने चर्चा सुरू झाली असून, या ठिकाणाची पुरातत्त्व विभागामार्फत सखोल पाहणी करण्यात यावी, अशी मागणी नागरिकांकडून होत आहे.
वसमत शहराला प्राचीन ऐतिहासिक वारसा लाभला आहे. यापूर्वीही मोठ्या तलावाच्या खोदकामावेळी चिरेबंदी बांधकाम असलेला सांडवा आढळून आला होता. त्यावेळी या संदर्भात विविध अफवा पसरल्या होत्या.
सध्या मोठ्या तलावाचे खोलीकरण व सुशोभीकरणाचे काम सुरू असून, यासाठी आमदार राजू पाटील नवघरे यांनी अडीच कोटी रुपयांचा निधी उपलब्ध करून दिला आहे. या निधीतून युद्धपातळीवर तलावाच्या खोदकामासह सुशोभीकरणाची कामे सुरू आहेत.
याच खोदकामादरम्यान पुरातन शिवलिंग आणि गणेशाची मूर्ती सापडल्याने या परिसरात पूर्वी एखादे प्राचीन मंदिर असावे, असा अंदाज व्यक्त केला जात आहे. त्यामुळे या संपूर्ण परिसराचे पुरातत्त्वदृष्ट्या सर्वेक्षण करून वस्तुस्थिती समोर आणावी, अशी मागणी स्थानिकांकडून केली जात आहे.
