ब्लॅक बॉक्ससह विमानातील रेकॉर्डिंग उपकरणांचा डेटा यशस्वीरीत्या मिळवला; पायलट सुमित कपूर यांच्या आर्थिक व्यवहारांत CID ला संशयास्पद बाब आढळली नाही
मुंबई : तत्कालीन उपमुख्यमंत्री अजित पवार यांच्या मृत्यूला कारणीभूत ठरलेल्या विमान अपघाताच्या तपासाचा अंतिम अहवाल पुढील वर्षी जानेवारीपर्यंत समोर येण्याची शक्यता आहे. एअरक्राफ्ट ॲक्सिडेंट इन्व्हेस्टिगेशन ब्युरो (AAIB) कडून तांत्रिक तपास पूर्ण झाल्यानंतरच केंद्रीय अन्वेषण विभागाच्या (CBI) चौकशीची पुढील प्रक्रिया सुरू होऊ शकते, अशी माहिती मुख्यमंत्री देवेंद्र फडणवीस यांनी शुक्रवारी महाराष्ट्र विधानसभेत दिली.
सभागृहातील चर्चेला उत्तर देताना फडणवीस यांनी सांगितले की, राज्य सरकारने या विमान अपघाताची CBI चौकशी करण्याची मागणी केली आहे. मात्र, अपघातामागील तांत्रिक कारणांचा शोध घेणाऱ्या AAIB चा तपास पूर्ण होणे आवश्यक असून त्यानंतरच केंद्रीय तपास यंत्रणेला पुढील चौकशी करता येईल.
दरम्यान, अपघातग्रस्त विमानाच्या ब्लॅक बॉक्ससह विमानातील अन्य रेकॉर्डिंग उपकरणांमध्ये नोंदवलेला डेटा यशस्वीरीत्या प्राप्त करण्यात आला आहे.
28 जानेवारीला बारामतीजवळ झाला होता अपघात
अजित पवार यांचा 28 जानेवारी रोजी विमान अपघातात मृत्यू झाला होता. मुंबईहून बारामतीकडे त्यांना घेऊन जाणारे खासगी विमान बारामती विमानतळाजवळ कोसळले होते. या दुर्घटनेत विमानातील सर्वांचा मृत्यू झाला.
विमान अपघातांचा तपास तांत्रिक स्वरूपाचा असल्याने तो पूर्ण होण्यासाठी सामान्यतः अधिक कालावधी लागतो. मात्र, या प्रकरणातील तपासाला गती देण्याची विनंती राज्य सरकारने केंद्र सरकारकडे केल्याचे फडणवीस यांनी सांगितले.
केंद्र सरकारने या तपासात परदेशी तज्ज्ञांचाही सहभाग घेतला असून अपघाताच्या पहिल्या वर्षपूर्तीपूर्वी अंतिम अहवाल प्राप्त होण्याची अपेक्षा असल्याचे मुख्यमंत्र्यांनी नमूद केले.
CID कडून समांतर चौकशी; फ्लाइट क्रूचीही तपासणी
AAIB च्या तांत्रिक तपासासोबत महाराष्ट्र सीआयडीकडूनही या प्रकरणाची स्वतंत्रपणे चौकशी सुरू आहे. तपासादरम्यान फ्लाइट क्रूच्या पार्श्वभूमीसह विविध पैलूंची पडताळणी करण्यात आली आहे.
पायलट सुमित कपूर यांच्याबाबत उपस्थित झालेल्या प्रश्नांच्या पार्श्वभूमीवर CID ने त्यांच्या आर्थिक व्यवहारांची सखोल तपासणी केली. त्यांच्या बँक खात्यांसह विमा पॉलिसी आणि शेअर बाजारातील व्यवहारांचीही पडताळणी करण्यात आली. मात्र, या तपासात कोणतीही संशयास्पद बाब आढळून आली नसल्याचे फडणवीस यांनी स्पष्ट केले.
AAIB च्या निष्कर्षांनंतरच जबाबदारी निश्चित होणार
अपघाताचे नेमके तांत्रिक कारण AAIB कडून निश्चित होईपर्यंत CID किंवा CBI कडून कोणावरही फौजदारी जबाबदारी निश्चित करणे शक्य नसल्याचे मुख्यमंत्र्यांनी सांगितले.
या दुर्घटनेशी संबंधित भावना समजण्यासारख्या असल्या तरी कायदेशीर जबाबदारी पुराव्यांच्या आधारेच निश्चित करावी लागते. AAIB चा अंतिम अहवाल प्राप्त होण्यापूर्वी कायदेशीरदृष्ट्या कोणाला जबाबदार धरता येणार नाही, अशी भूमिका फडणवीस यांनी सभागृहात मांडली.
